Ditën e mërkurë, më 20 nëntor 2013, Myftiu i Shkodrës Imam Muhamed Sytari, i shoqëruar edhe nga menaxheri i pronave z. Blendi Alushi, ka zhvilluar një inspektim në terren, për të vëzhguar nga afër gjendjen e punimeve në disa prej vakëfeve të Myftinisë Shkodër.
 
Fillimisht është bërë inspektimi i vakëfit në lagjen Dudas, ku me mbarësinë e All-llahut, shumë shpejt pritet të finalizohet përpjekja e Myftinisë Shkodër për ndërtimin e një xhamie të re, e munguar prej dekadash në këtë lagje të vjetër muslimane.
 
Më pas, Myftiu ka ndjekur nga afër punimet që po vijojnë për ndërtimin e xhamisë së re në zonën e ish- Zukthave, te vakëfi i vjetër i xhamisë që mbante emrin e bamirësit dhe hatibit të saj, Shaban Efendi.
 
Një problem në rrugën e ndërtimit të xhamisë së re qëndron një godinë e vogël, e ndërtuar mbi truallin e Myftinisë Shkodër, e legalizuar padrejtësisht në vitet e fundit nga ALUIZNI Shkodër. Myftinia Shkodër po bën të gjitha përpjekjet për ta pastruar këtë territor, në mënyrë që projekti i xhamisë të plotësohet tërësisht.
 
Është inspektuar edhe gjendja aktuale e vakëfit te Ura e Bunës, ku prej një viti ka nisur puna për ndërtimin e xhamisë së re. Pas përfundimit të minares me dy ballkone, që e ka zbukuruar krejt zonën, vijimi i punimeve do të bëjë të mundur përfundimin e xhamisë së re, mbi themelet e xhamisë së vjetër që ekzistonte më parë në këtë zonë.
 
Në ditët vijuese, Myftinia Shkodër do të vazhdojë përpjekjet e saj për të arritur çertifikimin e vonuar të krejt pronave të saj, lirimin e vakëfeve të uzurpuara, si dhe lobimin për vënien në efiçencë të tyre me ndërtime të reja.