Ditën e martë, më 19 nëntor 2013, Myftiu i Shkodrës Imam Muhamed Sytari ka zhvilluar një takim pune në zyrën e Kryetarit të Bashkisë Shkodër, z. Lorenc Luka.
 
Qëllimi i këtij takimi kanë qenë problematikat që lidhen me disa nga pronat e Myftinisë Shkodër, që presin ndërhyrjen e Bashkisë për t’u liruar dhe vënë në dispozicion të pronarit legjitim, pas plotësimit të krejt kushteve ligjore.
 
Në takim është diskutuar edhe për interesimin e përbashkët të Myftinisë dhe Bashkisë Shkodër në lidhje me Xhaminë e Plumbit dhe zonën përreth saj, si një ndër lagjet më të vjetra monument kulture në Shkodër.
 
Siç dihet, Myftinia dhe Bashkia Shkodër janë interesuar që herët për të përgatitur një projekt ambicioz që e shpëton përfundimisht Xhaminë e Plumbit nga situatat e përmbytjeve dhe neglizhencës së viteve të fundit. Projekti në fjalë i është dorëzuar Ambasadës së Kuvajtit në Tiranë, pas premtimit të bërë nga Qeveria e Kuvajtit për mbështetjen e dhe financimin e tij. Realisht, akoma nuk janë dhënë sinjalet e duhura dhe bindëse në këtë drejtim.
 
Myftiu e ka informuar Kryebashkiakun se gjatë vizitës së bërë para pak ditësh në Ankara, ka kërkuar nga Koordinatori i TIKA-s për Ballkanin ndërhyrje dhe mbështetje në lidhje me Xhaminë e Plumbit.
 
Njëkohësisht, edhe Kryetari i Bashkisë ka konfirmuar vullnetin dhe gatishmërinë e tij për të zhvilluar takimet e duhura me drejtues të TIKA-s në Tiranë, në lobim për këtë çështje.
 
Me rastin e kësaj vizite, Myftiu i ka dhuruar Kryetarit të Bashkisë z. Lorenc Luka, librin e tij më të ri me titull: “Nún – Pasha Lapsin…”.