Ditën e hënë, më 18 nëntor 2013, Myftiu i Zonës Shkodër, Imam Muhamed Sytari ka zhvilluar një vizitë nderi në zyrën e Drejtorit të ri të Policisë së Qarkut Shkodër, z. Shaban Nexhi.
 
Fillimisht Myftiu ka uruar Drejtorin e ri të Policisë së Qarkut Shkodër me rastin e marrjes së detyrës së re, si dhe ka shprehur falënderimet e tij për bashkëpunimin e deritanishëm me Policinë e Shkodrës në situata të ndryshme të këtij bashkëpunimi.
 
Drejtori i Policisë së Shkodrës, z. Shaban Nexhi, ka konfirmuar edhe një herë gatishmërinë e Policisë së Qarkut Shkodër për të qenë pranë Myftinisë Shkodër në çfarëdo nevoje, në rrugën e përmirësimit të cilësisë së bashkëpunimit në mes dy institucioneve dhe interesit social.
 
Biseda është përqendruar edhe në çështje konkrete që lidhen me aktivitetin e gjerë të Myftinisë Shkodër dhe nevojën e herë pas hershme për bashkëpunimin me Policinë e Shkodrës.
 
Drejtori i Policisë ka shprehur vullnetin e tij dhe të institucionit që drejton për të qenë të gatshëm për të ndërhyrë në çdo moment kur Myftinia Shkodër do të ketë nevojë, sidomos në raport me çështjen e pronave dhe moscënimin e tyre, mosprekjen e shenjtërisë së xhamive të saj etj.
 
Me rastin e kësaj vizite, Myftiu i Shkodrës i ka dhuruar Drejtorit të Policisë së Qarkut Shkodër një kopje të Kur’anit me përkthimin e kuptimeve të ajeteve të tij në gjuhën shqipe.