Mbrëmjen e së shtunës, më 16 nëntor 2013, nëpërmjet valëve të Tv Rozafa, Myftinia Shkodër ka shfaqur një dokumentar, me dëshmi dhe fakte konkrete mbi rihapjen e Xhamisë së Plumbit. Ky dokumentar shfaqet në kuadër të përkujtimit të datës së shënuar 16 nëntor 1990, ditë në të cilën u plotësuan kushtet për rihapjen e Xhamisë së Plumbit, pas një periudhe të errët 23 vjeçare, në të cilën shteti shqiptar mbylli shkollat fetare, shkatërroi xhamitë, ndaloi mësimin e edukatës fetare në shkollat e tij dhe u vetëdeklarua si “shteti i vetëm ateist në botë”.
 
Gjatë këtij dokumentari, teleshikuesit kanë pasur mundësi të dëgjojnë dëshmi të ndryshme rreth kushteve të vështira në të cilat muslimanët shkodranë mbanin fshehurazi ritet dhe adhurimet islame në periudhën e ndalimit të tyre me ligj. Njëkohësisht janë dhënë dëshmi për ditën e 16 nëntorit 1990, të cilat bartin përherë emocione dhe respekt për të gjithë kontribuesit dhe mbi të gjitha, zgjojnë ndjenjën e falënderimit ndaj All-llahut (xh.sh) që nuk e humbi këtë besim dhe këtë fé të pastër në këtë tokë islame.
 
Në dokumentar përftohen emocione të mëdha teksa dëgjohen dëshmi të ndryshme nga H. Mit’hat Myftija, rahmetliu H. Faik Zaganjori, si dhe dëshmohen pamje vizive të hoxhallarëve të nderuar si: H. Sabri Koçi, H. Sulejman Kraja etj, që nuk jetojnë më.
 
Dokumentari në fjalë transmetohet për herë të parë në një media vizive. Ai u ideua dhe u mbështet nga Myftiu i Shkodrës Imam Muhamed Sytari dhe u realizua nga gazetarë dhe operatëorë profesionistë të qytetit të Shkodrës, me rastin e 20 vjetorit të rihapjes së xhamisë së Plumbit dhe dëshmimit të lirë të vullnetit dhe përkatësisë fetare në vendin tonë.