Mbrëmjen e së shtunës, më 26 tetor 2013, Imam Muhamed Sytari ka ftuar një grup miqsh dhe të afërmish të njërit prej haxhilerëve të rinj të këtij viti, z. Shuajb Golemi, i cili ditën e nesërme udhëton drejt familjes së tij, larg Shqipërisë.
 
Qëllimi i ardhjes së tij në vendlindje ka qenë dëshira për të kryer haxhin në shoqëri të vëllezërve dhe motrave nga Shkodra dhe mbarë Shqipëria. Këtë e konfirmon edhe vetë, teksa dëshmon se: “I kam pasur mundësitë të shkoj në haxh nga vendi ku jetoj, por dëshira ime ishte ta kryej haxhin me vëllezërit e mi nga Shkodra, duke folur e duke u lutur në gjuhën shqipe!”.
 
I pranishëm në këtë bashkëbisedim të ngrohtë ishte edhe Myftiu i Malësisë së Madhe, H. Edmir Smajlaj, që këtë vit ishte pjesë e udhërrëfyesve të grupit shqiptar.
 
Emocionet e haxhit të sivjetshëm, kujtimet e bukura, momentet më të spikatura dhe shpirti i vendeve të shenjta, kanë shoqëruar këtë ndenje të këndshme, duke i dhënë një mirësi dhe ngjyresë besimi.
 
Haxhi Shuajb Golemi ka falënderuar organizimin e mbarë të Myftinisë Shkodër dhe Komunitetit Mysliman të Shqipërisë për këtë vit, duke dëshmuar një kënaqësi të madhe të përjetuar në vendet e shenjta gjatë ditëve të haxhit.
 
I pyetur nga të pranishmit se nëse do të shkonte përsëri në Mekë, i përlotur ai është shprehur se udhëtimi i haxhit është udhëtimi më i bukur i jetës dhe se nuk do të hezitonte të shkonte përsëri në haxh, pa ndërprerje!
 
Në fund të këtij takimi të këndshëm, H. Fejzi Zaganjori ka bërë një lutje, në të cilën është lutur që Zoti t’ia ketë pranuar haxhin e sivjetshëm grupit të shqiptarëve dhe mbarë haxhilerëve të botës islame. Njëkohësisht është lutur për shëndetin dhe mbarësinë e të nderuarit Haxhi Shuajb Golemi.