Mbrëmjen e së mërkures, më 23 tetor 2013, kanë mbërritur në Shkodër haxhilerët e këtij viti, që për rreth tre javë morën pjesë në kryerjen e adhurimeve dhe riteve fetare të haxhit.
 
Në pritje të tyre ka qenë Myftiu i Shkodrës Imam Muhamed Sytari, i shoqëruar nga imamët Idmir Plaku dhe H. Fejzi Zaganjori.
 
Në shoqërinë e salavateve që lartësoheshin nga minaret e xhamisë së Parrucës, haxhilerët janë takuar me Myftiun, imamët dhe familjarët e tyre, duke ndarë së bashku emocionet e para të një eksperience të mrekullueshme shpirtërore, gjatë qëndrimit në Mekë dhe Medine.
 
Haxhilerët kanë vlerësuar momentet e kaluar nën drejtimin e Myftiut të Malësisë së Madhe, H. Edmir Smajlaj dhe të përzgjedhurve të tjerë të Komunitetit Mysliman të Shqipërisë për udhëzimin e tyre në kryerjen e riteve gjatë haxhit të sivjetshëm.
 
Njëkohësisht kanë vlerësuar mënyrën e organizimit të haxhit të këtij viti, që sipas dëshmisë së tyre ishte një kongres madhështor mbarëbotëror, i kryer në kushte të përkryera, pa asnjë mangësi a vështirësi.
 
Ndërkohë, ditën e sotme, më 24 tetor 2013, Myftiu i Shkodrës Imam Muhamed Sytari ka pritur në zyrën e tij disa nga haxhilerët e Shkodrës, të cilët kanë ardhur për të shprehur kënaqësinë e tyre për kryerjen e haxhit, si dhe vlerësimet më të mira për organizimin e sivjetshëm.