Pasditën e së mërkures, më 23 tetor 2013, është falur namazi i xhenazes për shpirtin e të riut Osman Meraja, i cili u nda nga jeta në orët e vona të ditës së djeshme, si pasojë e një aksidenti të rëndë automobilistik, që i mori jetën pesë të rinjve shkodranë 17 vjeçarë.
 
Pas faljes së namazit të xhenazes, Myftiu i Shkodrës Imam Muhamed Sytari ka mbajtur një fjalë ngushëlluese për familjen, të afërmit, shokët dhe komunitetin në dhimbje për këtë humbje të pesëfishtë.
                                                                               
“Kemi ardhur në këtë botë pa na pyetur dhe largohemi prej saj kur ta ketë caktuar Zoti. Mirëpo dhimbja e këtyre djemve është shumë e madhe. Unë lutem për secilin prej tyre që të kenë mëshirën e Zotit. Njëkohësisht dua të bëj një thirrje të madhe për të gjithë shokët e Osmanit dhe shokët e djemve të rinj që përcollëm dje e sot, që mos ta harrojmë Zotin në jetë! Ta kërkojmë Zotin, mëshirën dhe dashninë e Tij, se jemi më tepër se kurrë nevojtarë për Të!”- ka thënë Myftiu.
 
Më pas, ka bërë një krahasim në mes të kësaj dhimbje dhe asaj të përmbytjeve të kaluara para dy viteve, ku ka thënë: “Kjo dhimbje është më e madhe se një përmbytje! Humbja e njerëzve dhe humbja e të rinjve, është më e madhe se përmbytja! Kemi përjetuar dhimbje të mëdha gjatë këtyre viteve, por nuk paska dhimbje më të madhe sesa me përcjellë pesë djem të rinj, të cilët largohen nga kjo botë duke lënë një dhimbje të madhe në zemrën e familjes, shokëve, bashkëmoshatarëve, krejt komunitetit”.
 
Ditën e djeshme dhe të sotme, Myftiu me bashkëpunëtorë të tij, ka kryer vizitat e ngushëllimit tek familjarët e të rinjve të humbur, sikurse është lutur për ta dhe shpirtrat e tyre.
 
Myftinia Shkodër do të mbajë lutje për të shpirtrat e pesë të rinjve dhe familjet e tyre, në të gjitha xhamitë e saj, të xhumanë, më 25 tetor 2013, gjatë ceremonive fetare të javës.