Mbrëmjen e së hënës, më 21 tetor 2013, pas faljes së namazit të akshamit në xhaminë e re të Dërgutit, Myftiu i Shkodrës Imam Muhamed Sytari, ka mbajtur një vasë, në të cilin ka folur mbi mirësinë e madhe të udhëzimit në Islam.
 
Myftiu ka folur mbi garancinë që Zoti i gjithësisë ka vendosur në mbrojtjen e Kur’anit si Libri i fundit hyjnor, përmbledhës i librave të mëparshëm. “Megjithatë, akoma ka përpjekje për ta deformuar thelbin e Kur’anit, qoftë me botime të devijuara të tij, që menjëherë demaskohen nga dijetarët. Në mesin e tyre mund të përmend edhe përkthimin në shqip të Kur’anit nga shtëpia botuese “Darus-Selam”, e kritikuar shkencërisht nga Hoxha i jonë Vehbi S. Gavoçi, copëzat e përkthimeve të devijuara që përdoren nga “Dëshmitarët e Jehovait”, etj, që kanë një qëllim të përbashkët dashakeq ndaj Thirrjes së Lashtë Hyjnore”- ka thënë Myftiu.
 
Më pas, ka folur mbi rëndësinë që ka prijësi fetar në mbrojtjen e mësimeve të besimit dhe përhapjen e tyre në masë. Me këtë rast ka bërë publik përzgjedhjen e të nderuarit z. Bledar Xama, si imam të xhamisë më të re në Shkodër, asaj të Dërgutit, si një njeri me vlerë, edukatë besimi, korrektësi, aftësi komunikimi dhe punë në komunitet.
 
Myftiu ka kërkuar nga besimtarët që ta përkrahin imamin e ri në detyrën e tij, të mbrojnë së bashku xhaminë dhe misionin e saj nga çdo përpjekje për ta prishur shpirtin dhe mesazhet që ajo përhap në shoqëri. Njëkohësisht ka lajmëruar se hytbet e xhumasë do të mbahen sipas një programi të përgatitur nga Myftinia Shkodër, ku do t’i jepet mundësia një numri të madh teologësh-imamë për të mbajtur hytben e xhumasë në këtë xhami të re, në shërbim të afrimit të xhematit dhe konsolidimit të tij.
 
Në fund, besimtarët janë përshëndetur me imamin e ri dhe i kanë uruar atij suksese dhe mbarësi në misionin fisnik dhe detyrën e lartë të ngarkuar nga Myftinia Shkodër.