E xhumaja e 18 tetorit 2013 do të mbahet mend si ditëlindja e xhamisë më të re në qytetin e Shkodrës, asaj në lagjen Dërgut.
 
Në prag të namazit të xhumasë së kësaj dite, Myftinia Shkodër dhe Shoqata “Burimi” kanë organizuar ceremoninë e inaugurimit të xhamisë së re në Dërgut, realizuar falë donacioneve të kuvajtianit Hamed El-Faris, me ndërmjetësimin e Shoqatës “Burimi” dhe drejtorit të saj, z. Sokol Mandi.
 
Pas prerjes së shiritit të inaugurimit të xhamisë së re nga Myftiu i Shkodrës, Kryetari i Këshillit të Qarkut Shkodër dhe Drejtori i Shoqatës “Burimi”, është mbajtur një ceremoni hapje, në prag të namazit të parë të xhumasë në këtë xhami të re.
 
Fillimisht, Myftiu i Zonës Shkodër, Imam Muhamed Sytari, ka falënderuar Shoqatën “Burimi” për bashkëpunimin me Myftininë Shkodër, që solli edhe realizimin e kësaj xhamie të re shumë të dashur për besimtarët.
 
Në fjalën e tij, Myftiu ka theksuar se: “Kush nuk falënderon njerëzit, nuk ka falënderuar as Zotin. Kësisoj unë dua të falënderoj interesimin dhe lobimin e Myftiut të Shkodrës në kohën e realizimit të këtij bashkëpunimi, Imam Ndriçim Sulejmani, si dhe Drejtorin e Shoqatës “Burimi”, z. Sokol Mandi, për këtë arritje të dashur për krejt komunitetin tonë”.
 
Myftiu ka vënë theksin te rëndësia që ka ngritja e xhamive të reja, në një kohë kur akoma në Shqipëri vazhdon të ndjehet ndikimi i mësimeve të sistemit ateist që prishi dhe shkatërroi xhamitë dhe institucionet islame të kultit.
 
Ceremoninë e ka përshëndetur edhe Drejtori i Shoqatës “Burimi”, z. Sokol Mandi, që ka falënderuar bashkëpunimin me Myftininë Shkodër, duke shprehur njëkohësisht edhe kënaqësinë e madhe të mbërritjes së kësaj dite të begatë. Në fjalën e tij ka shprehur falënderimet e tij edhe për donatorin nga Kuvajti, z. Hamed El-Faris si dhe bashkëpunëtorët e shoqatës së tij për kontributin dhe sakrificën në plotësimin e këtij projekti të bukur.
 
Një fjalë përshëndetëse ka mbajtur edhe z. Arben Ramkaj, që ka shprehur kënaqësinë e pjesëmarrjes në këtë ceremoni të gëzueshme për Shkodrën dhe për mbarë bashkësinë e muslimanëve të saj.
 
Ka përshëndetur edhe Kryetari i Këshillit të Qarkut Shkodër, z. Maxhid Cungu, që ka vlerësuar ndërtimin e xhamisë së re në lagjen Dërgut, duke shprehur njëkohësisht mirënjohjen e tij për Myftininë Shkodër dhe bashkëpunëtorët e saj, që po punojnë përherë e më shumë për ngritjen e xhamive të reja në qytet.
 
Me përfundimin e kësaj ceremonie, është kënduar ezani i parë i xhumasë, nga teologu Naim Drijaj, imam i xhamisë Parrucë, si dhe është mbajtur hytbeja e parë e xhumasë nga Myftiu I Shkodrës Imam Muhamed Sytari.