Me rastin e festës së begatë të Kurban Bajramit, që nisi ditën e martë, më 15 tetor 2013, Myftinia Shkodër ka organizuar shpërndarjen e kurbaneve të shumta, të bëra nga vetë ajo, si dhe ato të ardhura nga besimtarë të ndryshëm, shoqata bamirëse, Qendra Islame Shqiptare në Kenosha të ShBA, Dijaneti i Turqisë, dhe Ambasada e Kuvajtit në Tiranë.
 
Duke nisur nga dita e parë e Kurban Bajramit të sivjetshëm, dita e dytë dhe e tretë, janë organizuar grupet e punës që po merren me kryerjen e të gjitha proceseve për përgatitjen e pakove me mish kurbani, për t’u shpërndarë në dyert e të varfërve, nevojtarëve etj.
 
Ditën e parë të Kurban Bajramit, Myftinia Shkodër ka kryer shpërndarjen e 50 kurbaneve të ardhura nga Dijaneti i Turqisë, të cilat janë shpërndarë për njerëz në nevojë në 32 xhami të qytetit dhe fshatit.
 
Ndërkohë, është bërë edhe shpërndarja e 10 kurbaneve të ardhura nga Ambasada e Kuvajtit në Tiranë, të cilat i janë dërguar Shtëpisë së Fëmijës dhe Shtëpisë së të Moshuarve të Shkodrës, duke kontribuar sadopak në gëzimin dhe atmosferën e kësaj feste në banorët e këtyre dy institucioneve.
 
Në ditën e dytë të Kurban Bajramit, janë shpërndarë qindra pako me mish kurbani për njerëzit në nevojë të shumë xhamive të tjera dhe njerëzve të varfër të qytetit.
 
Myftinia Shkodër shpreh mirënjohjen e saj dhe falënderimet më të sinqerta për Qendrën Islame Shqiptare në Kenosha të ShBA, Dijanetin e Turqisë dhe Atasheun z. Shaban Ishlek, Ambasadën e Kuvajtit në Tiranë, Shoqatën “Istanbul”, si dhe të gjithë biznesmenët dhe individët e ndryshëm që kanë afruar kurbanet e tyre për t’i shpërndarë për njerëzit në nevojë! All-llahu i shpërbleftë me të mirat e Tij!