Paraditën e së martës, më 15 tetor 2013, me rastin e Kurban Bajramit, Myftiu i Shkodrës Imam Muhamed Sytari ka pritur vizitorët e shumtë që kanë mbërritur në xhaminë e Parrucës për të ndarë kënaqësinë dhe urimet e tyre me rastin e kësaj feste të shënuar për mbarë botën islame.
 
Vizitorë të ndryshëm kanë dhënë mesazhet e tyre, ku kanë uruar të gjithë besimtarët muslimanë me rastin e kësaj feste të begatë, duke vlerësuar maksimalisht besimin, mesazhet e fesë dhe rolin e çmuar të këtyre ditëve në ruajtjen dhe kultivimin e mëtejshëm të frymës së besimit në shoqëri.
 
Të shumtë kanë qenë vizitorët që kanë ndarë urimet e festës së Kurban Bajramit me Myftiun dhe imamët e pranishëm në këtë pritje, si: Kryetari i Bashkisë Shkodër, Prefekti i Qarkut Shkodër, Kryetari i Këshillit të Qarkut Shkodër, Kryetari i Këshillit të Bashkisë Shkodër, Drejtori i Policisë Shkodër, Arqipeshkvi Shkodër-Pult, Famullitari i Kishës Ortodokse, deputetë të forcave politike, Konsulli i Italisë në Shkodër, Drejtori i Kolegjit “Hasan Riza Pasha”, drejtues të shoqatave etj.
 
Në përfundim të pritjes tradicionale të Kurban Bajramit, Myftiu ka falënderuar përzemërsisht vizitorët e shumtë, miqtë dhe dashamirët e Myftinisë Shkodër, si dhe në mënyrë të veçantë gazetarët dhe operatorët e mediave lokale të Shkodrës, që ndoqën hap pas hapi ceremoninë e Kurban Bajramit dhe pritjen e miqve.