Ditën e shtunë, më 12 tetor 2013, Myftiu i Shkodrës Imam Muhamed Sytari ka inspektuar në terren punimet në dy xhami të reja të Shkodrës, në prag të inaugurimit të tyre.
 
Fillimisht është ndalur te xhamia e fshatit Mes-Myselim, e cila i është afruar inaugurimit të saj, që me mbarësinë e All-llahut shpresohet të ndodhë brenda këtij viti.
 
Më pas, Myftiu ka ndjekur nga afër punimet e fundit që po bëhen në prag të inaugurimit të xhamisë së re në lagjen Dërgut. I shoqëruar edhe nga drejtori i Shoqatës “Burimi”, teologu Sokol Mandi, ka vizituar ambientet e kësaj xhamie të re, që përbëhet nga tre kate, të shfrytëzuara maksimalisht në shërbim të projektit të bukur që do të zbukurojë lagjen dhe jetën e besimtarëve të saj.
 
Myftiu ka falënderuar drejtorin e Shoqatës “Burimi” për kontributin e madh në drejtim të mbështetjes financiare dhe ndjekjen e realizimit të kësaj xhamie të domosdoshme për besimtarët muslimanë të kësaj zone me tradita islame.
 
Njëkohësisht është caktuar që ceremonia e inaugurimit të xhamisë së re në Dërgut të zhvillohet ditën e xhuma, më 18 tetor 2013, duke nisur nga ora: 12.00.