Mbrëmjen e së xhumasë, më 11 tetor 2013, Myftinia Shkodër ka organizuar një emision fetar special, në prag të Haxhit dhe Kurban Bajramit të këtij viti.
 
Pyetjeve të teologut Arben Halluni në lidhje me atmosferën fetare në prag të Kurban Bajramit, udhëtimin e muslimanëve shqiptarë e atyre shkodranë në veçanti për kryerjen e haxhit të sivjetshëm, afrimin e njerëzve me frymën e moralit islam etj, i është përgjigjur Myftiu i Shkodrës Imam Muhamed Sytari.
 
Gjatë këtij emisioni, Myftiu ka vlerësuar emocionet dhe atmosferën festive të krijuar me rastin e përcjelljes së haxhilerëve të këtij viti, nga xhamia e Parrucës. Është theksuar se nga viti në vit, përcjellja e haxhilerëve po kthehet në një traditë fetare, origjina e së cilës u shkëput dekada më parë. Ai ka vlerësuar interesimin e besimtarëve muslimanë shkodranë për të kryer ritualet e haxhit, përtej sakrificës dhe shpenzimeve të mëdha ekonomike që ndodhin me këtë rast.
 
Myftiu është ndalur edhe te rëndësia që ka mirëkuptimi i kujtdo që dëshiron të afrohet dhe të dëshmohet si besimtar dhe adhurues i Zotit, duke mos paragjykuar asnjeri që nuk ka arritur pjekurinë e duhur në marrëdhëniet e tij me praktikën fetare.
 
Një nga temat e këtij emisioni ka qenë edhe mesazhi që jep Kurban Bajrami. Me këtë rast, Myftiu i Shkodrës ka theksuar se ndodhia e hz. Ibrahimit (a.s) dhe përkushtimi i tij në marrëdhënie me Zotin është një shkollë e madhe besimi. Kjo ngjarje, - ka thënë Myftiu,- na inspiron përherë për t’u bërë vepërmirë dhe të përkushtuar në jetë. Ajo nxit afrimin e njerëzimit me vullnetin e nënshtrimit ndaj besimit, fesë dhe udhëzimin drejt vullnetit të All-llahut për njeriun në këtë jetë.
 
Në fund të emisionit janë dhënë edhe urimet e para me rastin e Kurban Bajramit.