Ditën e xhuma, më 4 tetor 2013, nga xhamia e Parrucës është bërë përcjellja e haxhilerëve të këtij viti, që do të udhëtojnë nga Shkodra drejt vendeve të shenjta për kryerjen e njërës prej pesë shtyllave të fesë islame, haxhit.
 
Gjatë hytbes së xhumasë, Myftiu i Shkodrës Imam Muhamed Sytari ka uruar haxhilerët, që do të kenë mundësinë të përjetojnë mirësitë e haxhit, në Qaben e Madhnueshme. Myftiu ka folur për vlerat e haxhit dhe madhështinë e qëndrimit në Arefat, ku do të fallen gjynahet e haxhilerëve dhe do të zbresë mëshira dhe butësia e All-llahut mbi ta.
 
Myftiu ka kërkuar nga haxhilerët që ta shfrytëzojnë kohën maksimalisht për të adhuruar All-llahun, për t’i bërë dhikër Atij dhe për të mbushur zemrën me emocionet e këtij adhurimi që tubon në një vend, miliona muslimanë nga mbarë rruzulli tokësor. Njëkohësisht ka kërkuar që haxhilerët të luten për Shkodrën dhe Shqipërinë, si dhe të mos harrojnë vëllezërit e tyre në Siri dhe në mbarë botën islame, që përjeton këto ditë një ndër sprovat më të rënda të shekullit.
 
Pas namazit të xhumasë, haxhilerët i ka përshëndetur edhe Myftiu i Malësisë së Madhe, H. Edmir Smajlaj, që këtë vit do të jetë udhërrëfyes i haxhive të Shkodrës dhe Malësisë së Madhe. Ai ka konfirmuar se haxhi është mirësi e Zotit dhe mundësia më e mirë për të mbushur zemrën me besim dhe afrim me Zotin. Ai është angazhuar që të lutet për xhematet e Shkodrës dhe të bëjë lutje për mirëqenien e muslimanëve shqiptarë dhe të mbarë botës.
 
Më pas, haxhilerët janë përshëndetur me besimtarët e shumtë, që kishin tejmbushur sheshin para xhamisë së Parrucës, duke uruar rrugë të mbarë dhe adhurim të pranuar për haxhilerët e Shkodrës dhe të mbarë botës islame.
 
Haxhilerët janë përcjellur deri në aeroportin e Rinasit nga Myftiu Imam Muhamed Sytari i shoqëruar nga imami i xhamisë Parrucë, teologu Naim Drijaj.