Për nder të imamit H. Kujtim Cufaj, që do të udhëtojë këto ditë drejt vendeve të shenjta për kryerjen e adhurimit të haxhit, Myftinia Shkodër ka organizuar ditën e martë, më 1 tetor 2013 një drekë, në të cilën kanë qenë të ftuar imamët dhe këshilltarët e saj.
 
Në fjalën e tij përshëndetëse të këtij takimi, Myftiu i Shkodrës, pasi ka falënderuar imamët dhe këshilltarët e pranishëm, ka theksuar se kjo drekë është një nderim dhe vlerësim për imamin e nderuar H. Kujtim Cufaj, që këtë vit do të kryejë adhurimet e haxhit.
 
Myftiu ka kërkuar nga imami i nderuar që të mos harrojë të lutet për Myftininë e Shkodrës, për imamët e saj, për xhematet dhe besimtarët e Shkodrës, si shenjë e vëllazërisë dhe harmonisë islame. Njëkohësisht është lutur që haxhilerët e këtij viti të kenë mbarësi, shëndet dhe të shijojnë momentet e këtij adhurimi të mrekullueshëm, pas të cilit do të kthehen si ditën që kanë lindur.
 
Drekën e ka përshëndetur edhe Myftiu i Malësisë së Madhe, H. Edmir Smajlaj, që këtë vit do të jetë pjesë e ekipit të udhërrëfyesve të Komunitetit Mysliman të Shqipërisë në udhëtimin e haxhit.
 
Pas drekës vëllazërore, H. Kujtim Cufaj ka shprehur mirënjohjen e tij për këtë frymë vëllazërie dhe respekti ndaj personit të tij. Imami i nderuar është përshëndetur me të gjithë imamët duke kërkuar lutjet e tyre dhe duke u angazhuar për t’i kujtuar para Qabes së Madhnueshme.