Mbrëmjen e së hënës, më 30 shtator 2013, pas namazit të akshamit, në xhaminë e Parrucës ka nisur trajnimi treditor që Myftinia Shkodër organizon këtë vit për të regjistruarit për haxhin e këtij viti.
 
Në fjalën e tij përshëndetëse, Myftiu i Shkodrës Imam Muhamed Sytari ka vlerësuar mirësinë e Zotit ndaj të gjithë atyre që janë regjistruar këtë vit për kryerjen e haxhit. Myftiu është lutur për të gjithë ata që do të kryejnë haxhin e sivjetshëm, duke uruar që të ketë sa më shumë përfitime shpirtërore për të gjithë.
 
Ndërkohë Myftiu i Malësisë së Madhe H. Edmir Smajlaj, ka konfirmuar kënaqësinë e tij për të qenë në ekipin e Komunitetit Mysliman të Shqipërisë të kujdestarëve në shërbim të haxhive të këtij viti. Ai ka theksuar se me mbarësinë e Zotit do të kalohen eksperienca besimore nga më të mrekullueshmet, në atë që e ka quajtur si “udhëtimi i jetës”.
 
Më pas, teologu Ruzhdi Plangaj, ka nisur udhëzimet e tij drejtuar të regjistruarve për haxhin e këtij viti nga Shkodra. Fillimisht, ai ka përmendur vlerën e madhe që ka haxhi, si një adhurim që ndikon në fshirjen e gjynaheve dhe largimin e varfërisë nga realitetet e muslimanëve. Nëpërmjet haditheve të ndryshme dhe ajeteve kur’anore, ka shpjeguar mirësinë e madhe që ka kryerja e haxhit për atë që i ka mundësinë.
 
Më pas është përqendruar te rregullat juridike islame për kryerjen e një haxhi sa më të rregullt e në raport të drejtë me praktikën profetike.
 
Ky trajnim do të vijojë edhe ditën e martë dhe të mërkure, ndërkohë përcjellja e haxhilerëve të këtij viti do të bëhet ditën e xhuma, më 4 tetor 2013, menjëherë pas namazit të xhumasë, nga xhamia e Parrucës.