Ditën e hënë, më 30 shtator 2013, Myftiu i Shkodrës Imam Muhamed Sytari ka ndjekur në terren punimet për rehabilitimin e xhamisë në fshatin Shtoj i Vjetër.
 
I shoqëruar edhe nga imami i kësaj xhamie, teologu Ervil Kuçi, Myftiu ka parë nga afër punimet që po bëhen për t’i ndryshuar pamjen e brendshme dhe të jashtme kësaj xhamie, muret e brendshme të së cilës kishin nisur të mbuloheshin nga lagështia dhe myku dhe po ktheheshin në shqetësim për frekuentuesit e saj.
 
Myftiu ka përsëritur edhe një herë se xhamitë e ndërtuara pas viteve ’90, janë të një niveli dhe cilësie të dobët, të ngritura pa asnjë lloj përgjegjësie dhe shije arkitekture. Ai ka konfirmuar se Myftinia Shkodër është e interesuar dhe po lobon për rehabilitimin dhe restaurimin e shumë prej këtyre xhamive, sidomos në fshat, si dhe tërheqjen e fondeve për rregullimin e minareve dhe shtimin e tyre në qytet e fshat.
 
Nga ana e tij, imami i xhamisë Shtoj i Vjetër, teologu Ervil Kuçi, ka vlerësuar angazhimin e Myftinisë Shkodër për të sensibilizuar besimtarët muslimanë të Shkodrës dhe partnerët në drejtim të restaurimit të xhamive dhe plotësimin e nevojave që këto xhami kanë.