Paraditën e së enjtes, më 26 shtator 2013, Myftiu i Shkodrës Imam Muhamed Sytari, ka zhvilluar një inspektim në terren, ku ka parë nga afër gjendjen aktuale të punimeve për ndërtimin e xhamisë së re në fshatin Trush, komuna Bërdicë.
 
Në shoqërinë e imamit të xhamisë së këtij fshati, H. Jetmir Braqi dhe stafit të Myftinisë Shkodër, Myftiu ka vizituar vakëfin e xhamisë së fshatit Trush, ku ka inspektuar edhe punimet në vazhdim për plotësimin e ndërtimit të xhamisë së re.
 
Xhamia e re e fshatit Trush është një projekt i veçantë nga trashëgimia osmane dhe që zbatohet me shumë përkushtim nën mbikëqyrjen e vazhdueshme të inxhinierëve dhe mjeshtrave nga Turqia.
 
Myftiu ka falënderuar imamin për ndjekjen e vazhdueshme të punimeve dhe mbikëqyrjen e realizimit të këtij projekti. Njëkohësisht ka falënderuar kontributin e shoqatës ALSAR, për zbatimin e këtij projekti në Shkodër, në bashkëpunim me Myftininë Shkodër.
 
Xhamia e re në fshatin Trush është pjesë e bashkëpunimit të Myftinisë Shkodër me shoqatën ALSAR, Tiranë, që ka ndërmjetësuar për financimin e këtij projekti të bukur të kësaj xhamie, që do të një ndër ndërtimet më të spikatura të infrastrukturës islame në Shkodër, në vitet e post-komunizmit.