Ditën e xhuma, më 6 shtator 2013, nga minberi i xhamisë së Tophanës, Myftiu i Shkodrës Imam Muhamed Sytari ka hedhur dritë mbi sprovën e madhe që po kalon ymeti islam, nga lindja në perëndim, sidomos në Lindjen e Mesme.
 
Në hytben e tij, Myftiu i është referuar edhe gjendjes së vështirë të vrasjeve, sektarizmit, grupeve ekstremiste të mbështetura nga perëndimi, destabilizimit politik dhe mungesës së sigurisë në Irak, Egjipt dhe Siri.
 
“Është detyra e jonë të vazhdojmë të lutemi për këto vende, por njëkohësisht t’i lutemi All-llahut që kohës së ndarjes së botës islame me kufij të paracaktuar nga perëndimi, t’i vijë fundi. Bota islame është një, ymeti islam është një, jo si dëshirojnë ata që punojnë ditë-natë për përçarjen e muslimanëve, për shkaqe fetare! Disa frikësohen për luftën e tretë botërore. Në fakt ajo ka kohë që ka nisur, që kur kancelaritë e perëndimit përcaktuan se lufta e ardhshme, pas komunizmit është kundër Islamit! Mjeranët ata, që vendosën shenjën e barazisë në mes të një sistemi vrastar e injorant që e krijuan me duart e tyre dhe Fesë së Zotit, që nuk ka dorë në botë që mund ta devijojë a prishë!
 
Armiqësia e jonë është kundër shejtanit dhe pasuesve të tij, këtë na e ka kërkuar Kur’ani, të cilit duhet t’i nënshtrohemi dhe t’i kërkojmë mbrojtje All-llahut në këtë ballafaqim që nuk mbyllet asnjëherë.
 
Sa të jemi në këtë botë, ne jemi në luftë me shejtanin dhe bijtë e tij! Por, të jeni të bindur se betejat me shejtanin janë të fituara përherë nga besimtarët. Prandaj ta ruajmë e ta forcojmë përherë harmoninë dhe vëllazërinë në mes nesh. Të kthehemi nga Zoti! T’i tërheqim vëmendjen të afërmve, miqve, komshive, se e ardhmja është e besimit dhe besimtarëve!
 
Ky është shekulli i Islamit dhe i rënies së perandorive të shejtanit, femohimit, krimeve ndaj njerëzimit, shkatërrimit të popujve dhe ekonomive të tyre, imoralitetit!”- ka thënë Myftiu.
 
Gjatë kësaj hytbeje, Myftiu ka bërë thirrje për të kontribuar për disa nga xhamitë e zonës Postribë, si: Xhamia në Vilëz, në Drisht, në Mes-Myselim, në Milan-Rrasek etj.
 
Pas namazit të xhumasë, Myftiu i Shkodrës Imam Muhamed Sytari ka drejtuar një lutje të gjatë për Sirinë, ku i është lutur All-llahut të pushojë lufta, destabiliteti politik, ekonomik dhe të kthehet siguria dhe mirëqenia në atë vend të begatë.