Ditën e enjte, më 5 shtator 2013, Myftiu i Shkodrës Imam Muhamed Sytari ka mbledhur imamët dhe teologët e qytetit të Shkodrës, në një takim pune, në prag të xhumasë së parë të muajit shtator.
           
Në fjalën e tij, Myftiu ka bërë një analizë të shpejtë të muajit Ramazan dhe ka nxitur  domosdoshmërinë e shfrytëzimit të kohës dhe mundësive për të kryer me sa më shumë përkushtim obligimet ndaj Thirrjes Islame dhe nevojave të besimtarëve.
           
Myftiu ka theksuar se ditët e sotme janë të mbushura me sprova nga më të ndryshmet, kundër Islamit dhe muslimanëve, kudo në botë. Ka përmendur realitetet e mjegullta dhe të dhimbshme në Egjipt, Siri, Irak, Palestinë etj, dhe ka kërkuar nga imamët vijimin e sensibilizimit të besimtarëve për të bërë sa më shumë lutje për fëmijët, nënat, baballarët, pleqtë e plakat, burrat e gratë e pafajshëm në këto vende, që përballen me zullume, që nuk kanë lidhje me Islamin dhe mësimet e tij.
           
Myftiu ka dhënë sihariq se kjo që po ndodh në botën islame është shenjë e mirë, pasi pas natës së errët shumë shpejt vjen agimi. “Ky është shekulli i Islamit dhe i shpërbërjes së perandorive të femohimit, vrasjes, krimeve të luftës, shkeljes së të drejtave të njeriut, shthurrjes morale dhe islamofobisë!” – ka thënë Myftiu.
           
Myftiu ka prezantuar para imamëve edhe programin e ri të derseve të përditshme në xhamitë e Shkodrës, që rinis ditën e hënë, më 9 shtator 2013.
           
Njëkohësisht është dhënë udhëzim që ditën e xhuma, më 6 shtator 2013 të mblidhen fonde bamirësie në të gjitha xhamitë e qytetit, në drejtim të rinkonstruksionit dhe ndërtimeve të reja në xhamitë e zonës Postribë.