Mbrëmjen e së hënës, më 2 shtator 2013, në vazhdën e nismës më të re të Myftinisë Shkodër: “Të falim akshamin së bashku”, Myftiu i Shkodrës Imam Muhamed Sytari, ka vizituar xhaminë e fshatit Mes-Myselim, i shoqëruar edhe nga imami i saj, teologu Altin Nikshiqi.
 
Pasi ka drejtuar namazin e akshamit, Myftiu ka mbajtur një ders mbi vlerën e përkrahjes së muslimanëve në mes vete.
 
Në fjalën e tij, Myftiu është përqendruar tek tekstet kur’anore, që vlerësojnë përkrahjen e vazhdueshme që muslimani duhet t’i japë vëllasë së tij musliman, duke e urdhëruar për të mirë, duke e ndaluar nga e keqja dhe duke bashkëpunuar me të në jetë.
 
Myftiu ka theksuar se sot, më shumë se kurrë, kur bota është vërsulur si egërsira mbi kafshatën e saj, mbi muslimanëve, vendeve dhe pasurive të tyre, muslimanët e kanë për detyrë të mbështesin njëri-tjetrin, duke plotësuar në këtë mënyrë një ndër urdhëresat kur’anore për përkrahje dhe mbështetje në mes vete.
 
Në përfundim të këtij dersi, Myftiu i është përgjigjur edhe pyetjeve të të ndryshme të drejtuara nga besimtarët e pranishëm në këtë mexhlis të begatë.
 
Nisma e re: “Të falim akshamin së bashku”, ka nisur më 26 gusht 2013, në xhaminë e Plumbit dhe do të vazhdojë me mbarësinë e All-llahut edhe në xhami të tjera të Zonës Shkodër.