Ditën e xhuma, më 23 gusht 2013, nga minberi i xhamisë së Parrucës, Myftiu i Shkodrës Imam Muhamed Sytari, ka folur mbi realitetet e botës islame dhe dhimbjen e madhe që ka kapluar gjeografinë e vendeve me popullsi muslimane, sidomos atë të vendeve arabe.

“Në fillim të kësaj hytbeje, dua të shpreh një ngushëllim të sinqertë për secilin prej jush, për mbarë komunitetin tonë. Dua të shpreh një ngushëllim të madh për vëllezërit tanë në botën arabe islame, që vriten pafajshmit gjatë këtyre ditëve të fitnes më të madhe të shekullit që ka kapluar botën arabe dhe atë islame.

Para dy ditësh, në Guta të Damaskut, mbi një mijë muslimanë të pafajshëm, në mesin e të cilëve qindra fëmijë, u gdhinë të vdekur nga gazi sarin. Cili ishte faji i tyre? Çfarë gjynahi bënë që të pësonin këtë fund të dhimbshëm? (Ne besojmë se ata janë shehidë tek All-llahu, por kush përgjigjet për këtë krim ndaj njerëzimit?!) Ata fëmijë të pafajshëm, janë përkufizimi më i mirë që Kur’ani i bën realiteteve të periudhës së injorancës arabe, para Islamit: “Dhe kur vajzat e groposura do të pyeten në ditën e llogarisë: Për çfarë faji u vranë?”
 
Prandaj, detyra dhe obligimi i secilit prej nesh është të mos neglizhojë këto lajme, por të kuptojë thellë në veten e tij se kjo është një luftë kundër Islamit dhe mirësisë së tij!
 
Sot, na etiketojnë si terroristë, ekstremistë, vrastarë etj, në fakt ne nuk jemi kështu. Historia e jonë është historia e paqes, e tolerancës, e bamirësisë! Ne nuk kemi djegur dijetarët, nuk kemi djegur bibliotekat, nuk kemi shkatërruar trashëgiminë e tjerëve, nuk kemi vrarë fëmijë, gra, pleq, të pafajshëm, nuk kemi djegur pemë! Ne jemi muslimanë, burimi i mirësisë, paqes, bamirësisë!
 
Prandaj, kjo që ndodh sot, duhet të na nxisë të kthehemi nga shembulli i Resulull-llahit (a.s) në mënyrën e jetesës, në komunikim me njëri-tjetrin dhe botën mbarë. Sepse, modeli më i mirë i jetesës tonë është Islami, jo modeli që na serviret sot nga të pafétë!
 
Ajo që ndodh sot në botën islame, është shenjë e ringjalljes islame dhe dëshmimit të këtij shekull si shekulli i Islamit!” – ka thënë ndër të tjera Myftiu.
 
Gjatë kësaj hytbeje, Myftiu ka bërë thirrje që të bëhen lutje pas çdo namazi, për vëllezërit tanë muslimanë në Siri, në Egjipt dhe në mbarë botën.
Pas namazit të xhumasë, në drejtimin e Myftiut është kryer falja e namazit të xhumasë në mosprezencë, për shehidët e Gutas në Damask të Sirisë.