Që në orët e para të mëngjesit të ditës së enjte, më 8 gusht 2013, besimtarë të shumtë muslimanë, nga çdo cep i Shkodrës, janë grumbulluar në sheshin bri xhamisë “Ebu Bekër”, për të marrë pjesë në ceremoninë e Fitër Bajramit të këtij viti.
           
Pas 30 ditëve agjërim, lutje, adhurime, lexim Kur’ani e bamirësi, muslimanët e Shkodrës, të Shqipërisë dhe të mbarë botës islame, festojnë sot ditën e parë të Fitër Bajramit.
           
Pas faljes së namazit të sabahut me xhemat, ceremonia e kësaj dite ka vijuar me ligjëratën e parë fetare të mbajtur nga thirrësi islam Lavdrim Hamja. Gjatë saj, ai ka folur mbi rëndësinë që ka vlerësimi i Kur’anit në jetën e muslimanit, si burimi kryesor i fesë dhe besimit. Ai ka përmendur se Kur’ani është Libri i fundit i zbritur për udhëzimin e njerëzimit në besimin dhe udhëzimin hyjnor. Njëkohësisht ka kërkuar nga të pranishmit që të sillen nga Kur’ani dhe ta bëjnë atë pjesë të jetës së tyre, me lexim, mësim dhe veprim
           
Ligjërata e dytë e kësaj dite, është mbajtur nga Myftiu i Shkodrës Imam Muhamed Sytari. Në fjalën e tij, Myftiu ka tërhequr vëmendjen e të pranishëmve të panumërt, rreth domosdoshmërisë së kthimit nga dija dhe braktisjes së injorancës dhe veseve që ajo prodhon në shoqëri.
           
Myftiu ka theksuar se realitetet e sotme shqiptare janë rezultat i rrugëtimeve të gabuara drejt ateizmit dhe afetarizmit, si dhe tendencave islamofobe, që po zëvendësojnë sot periudhën e komunizmit vrastar të para 23 viteve.
           
Për këtë, Myftiu ka kërkuar që lënda e edukatës fetare të bëhet pjesë e kurrikulave në shkollat e Shqipërisë, edhe si një model europian. Myftiu i është referuar edhe mesazhit që Papa i ri i ka dërguar botës islame, ku ndër të tjera fton drejt respektit të ndërsjellët nëpërmjet edukimit. Nga këtu, Myftiu ka kërkuar edhe nga drejtuesit e tjerë fetarë që të bashkohen në këtë kërkesë më se legjitime për shtimin e lëndës së edukatës fetare në kurrikulat e arsimit parauniversitar shqiptar.
           
Pas faljes së namazit të Fitër Bajramit, hytbeja e kësaj dite festive është mbajtur nga imami i xhamisë “Ebu Bekër”, teologu Idmir Plaku, në të cilën ka folur rreth vlerave të kësaj dite, si dhe mesazheve universal të muajit Ramazan, që duhen vepruar edhe pas tij.