Imam Muhamed Sytari
Myfti i Zonës Shkodër

Të dashur vëllezër dhe motra besimtarë,

Për një muaj të tërë, krejt ju, u rikthyet me zemër e shpirt në origjinën e marrëdhënies së kulluar me All-llahun, duke dëshmuar besimin tuaj, përkushtimin dhe sakrificën ndaj Tij, me agjërim, me lexim Kur’ani, me bamirësi, me namaz nate, me lutje pafund dhe rrugëtim drejt sekreteve të besimit.
           
Sofrat e syfyrit dhe ato të iftarit zëvendësuan rutinën e përditshme të 11 muajve të mëparshëm, duke zëvendësuar njëkohësisht plogështinë me gjallëri, vetminë me shoqëri e, duke u bërë dëshmitarë të harmonisë dhe forcimit të vëllazërisë në mes vete dhe me të tjerët.
           
Fitër Bajrami që po vjen, është një mundësi tjetër për të marrë bekimet e Zotit nëpërmjet dëshmimit të përkatësisë fetare, duke u bashkuar të gjithë në namazin e sabahut dhe atë të bajramit, si një familje e vetme, e madhe dhe që përherë ka shumë për të thënë e për të bërë, me vullnetin dhe mbarësinë e Zotit.
           
Sfida të reja e presin shoqërinë tonë, rininë shqiptare, fëmijët tanë. Vetëm duke e kthyer mendjen dhe qëllimet nga Zoti, mund të pritet e mira. E deri atë kohë, ne si besimtarë nuk duhet të rrijmë të mbyllur nëpër xhami, as ta bunkerizojmë mendimin dhe thirrjen tonë, përkundrazi duhet ta dëshmojmë atë kudo që të jemi, të bashkëpunojmë për një të ardhme më të mirë, më të dëshmuar si faktor pozitiv e ndërtues në shoqëri, më të fortë, më të organizuar, më të përkushtuar ndaj All-llahut, me mbarësinë e All-llahut!
           
Nuk duhet të presim dhe as të lejojmë që fëmijët tanë të edukohen me mësimet e ateizmit, me edukatën e shthurrjes, me moralin e përzierjes së masave pa besim e fé, por duhet të angazhohemi që ata të rriten me besimin në Një Zot, me edukatën e dijes, me moralin e punës së ndershme, me pastërtinë dhe fisnikërinë e nderit, me vullnetin e forcimit të harmonisë, me respektin e ndërsjellët, me pranimin e tjetrit brenda kufijve të tolerancës së kufijve, jo në vorbullën e tendencave tjetërsuese të vullneteve, qëllimeve, rrugëtimeve shpirtërore.
           
Tashmë, Fitër Bajrami po vjen dhe të gjithë e kemi mundësinë për ta dëshmuar Fjalën e All-llahut në gëzimin tonë, që përkthehet me shtimin e adhurimit dhe përkushtimit për t’u bërë mbrojtës në shoqëri, ndërtues me dije, përhapës të shpresës, pranues të vlerave dhe zhvillues të tyre. Prodhues të mendimit dhe bartës të zgjidhjeve për lëngatat e shfaqura e ato që do të pasojnë, në një shoqëri që ka vite që ka e humbur busullën e shpirtit dhe ngjyrën e identitetit.
           
Me zemër lutem për ju, All-llahu jua pranoftë adhurimet e këtij muaj, ju bëftë dritë udhëzuese, për vete dhe të tjerë, ju udhëzoftë në jetë dhe ju dhashtë mbrojtje nga çdo e dëmshme.
           
     Mubarek Fitër Bajramin!

Shkodër, më 7 gusht 2013