Ditën e hënë, më 5 gusht 2013, është organizuar iftari i vëllazërisë dhe binjakëzimit në mes të Myftinisë Shkodër me atë të Iskenderunit (Turqi) dhe Këshillin e Bashkësisë Islame Prizren (Kosovë). Iftari është organizuar nën përkujdesjen dhe koordinimin e Atasheut për Çështjet Fetare në Ambasadën e Turqisë në Tiranë, z. Shaban Ishlek.
           
Iftarin e kanë përshëndetur, Myftiu i Shkodrës Imam Muhamed Sytari, Atasheu Shaban Ishlek dhe Kryetari i K.B.I Prizren Lutfi ef. Ballëk, të cilët kanë vlerësuar frymën e bashkëpunimit dhe binjakëzimit në mes institucioneve përkatëse, si dhe mirësinë e këtyre ditëve të begata të Ramazanit, në të cilat shtohen tryezat dhe takimet vëllazërore.
           
Është vlerësuar shtimi i aktiviteteve në dobi të bashkëpunimit dhe rritjes së takimeve në mes drejtuesve dhe besimtarëve të komuniteteve përkatëse.
           
Iftari është shoqëruar edhe me këndimin e disa ilahive të bukura nga hafizë të ardhur nga Turqia, të cilët e kanë zbukuruar këtë mbrëmje të begatë vëllazërore.            

Të pranishëm në këtë iftar kanë qenë imamë të Myftinisë Shkodër, imamë nga Prizreni dhe nga Turqia, drejtues të shoqatave islame, besimtarë dhe aktivistë të Myftinisë Shkodër.