Ditën e shtunë, më 3 gusht 2013, Myftinia Shkodër në bashkëpunim me Grand Hotel Europa, kanë organizuar iftarin tradicional të Natës së Kadrit.

Të pranishëm në këtë iftar kanë qenë përfaqësues të lartë të Myftinisë Shkodër, drejtues të komuniteteve fetare, Kryetari i Bashkisë z. Lorenc Luka, drejtues të tjerë lokalë e vendor, intelektualë, biznesmenë e besimtarë të shumtë.

Në emër të Myftinisë Shkodër ka përshëndetur teologu Arben Halluni, i cili ka vlerësuar bujarinë dhe traditën shembullore të krijuar nga Grand Hotel Europa dhe pronari i saj, z. Agron Çela, në shtrimin e iftarit të Natës së Kadrit.

Ai ka përcjellur edhe urimet më të mira të Myftiut të Shkodrës, duke përcjellur lutjet e tij për mbarësinë e të gjithëve, në këtë natë dhe në çdo përpjekje për të rrugëtuar drejt bamirësisë.

Njëkohësisht ka theksuar se kjo Natë është më e mirë se një mijë muaj, prandaj duhet që besimtarët të përfitojnë nga momentet e saj për t’u afruar me Zotin nëpërmjet adhurimit dhe bamirësive.

Pas iftarit, besimtarët janë drejtuar nëpër xhamitë e ndryshme për të marrë pjesë në lutjet dhe adhurimet e Natës së Kadrit.