Ditën e xhuma, më 2 gusht 2013, Myftiu i Shkodrës Imam Muhamed Sytari me një grup këshilltarësh të Myftinisë Shkodër, ka marrë pjesë në iftarin e shtruar nga Bashkësia Islame e Prizrenit, në një nga restorantet e këtij qyteti.
           
Në rolin e mikpritësit, Kryetari i Bashkësisë Islame të Prizrenit, Lutfi ef. Ballëk, në përshëndetjen e tij ka uruar të pranishmit me rastin e Muajit Ramazan dhe ka falënderuar mysafirët nga Shkodra për pjesëmarrjen e tyre në këtë sofër vëllazërore e bujare. Ai ka vlerësuar këto ditë të Ramazanit si mundësi për të shtuar veprat e mira dhe bamirësitë në shërbim të komunitetit dhe njerëzve në nevojë.
           
Këtë sofër e kanë përshëndetur edhe ambasadorja e Turqisë në Kosovë, si dhe përfaqësuesi i lartë i Bashkësisë Islame Kosovë, z. Resul Rexhepi.

Në fjalën e tij përshëndetëse Myftiu i Shkodrës Imam Muhamed Sytari ka vlerësuar protokollin e binjakëzimit në mes të dy myftinive dhe marrëdhëniet e mira dhe vëllazërore në mes tyre. Ai ka vlerësuar realitetet e lëvizjes së lirë dhe mundësitë e komunikimit në mes shqiptarëve në tokën e tyre shekullore. Njëkohësisht është lutur për mbarësinë e shqiptarëve, kudo që të jenë.
           
Gjatë këtij iftari është dëshmuar edhe një herë vullneti i mirë për bashkëpunim dhe shtim të aktiviteteve të përbashkëta fetare dhe sociale në shërbim të vlerave islame dhe kombëtare në mesin e shqiptarëve, në krejt trojet e tyre.