Mbrëmjen e së mërkures, më 31 korrik 2013, Kryetari i Bashkisë Shkodër, z. Lorenc Luka ka shtruar iftarin tradicional të Bashkisë Shkodër, me rastin e Muajit të Madhërueshëm të Ramazanit.
           
Në këtë iftar kanë qenë të ftuar drejtuesit kryesorë lokalë e vendorë të Shkodrës, përfaqësuesit e lartë të komuniteteve fetare në Shkodër, drejtues të shoqatave islame, imamë, teologë, këshilltarë të Bashkisë etj.
           
Në fjalën e tij të rastit, Kryetari i Bashkisë Shkodër, z. Lorenc Luka, ka vlerësuar besimin si shtyllën kryesore të harmonisë dhe mirëkuptimit në shoqëri. Ai ka vlerësuar Muajin Ramazan si muaj të adhurimit dhe kthimit nga Zoti me përkushtim. Njëkohësisht ka falënderuar kontributin e komuniteteve fetare në Shkodër, si burim harmonie dhe përkushtimi në Shkodër.
           
Imam Muhamed Sytari, pasi ka falënderuar Kryetarin e Bashkisë Shkodër për këtë iftar, ka vlerësuar mbi të gjitha shembullin e harmonisë ndërfetare në Shkodër, që dëshmohet sidomos në raste festash e gëzimesh të ndërsjellta fetare.
           
Dom Gjovalin Sukaj, Famullitar i Kishës katolike, ka uruar të pranishmit me rastin e Muajit Ramazan dhe ka vlerësuar sofrat e besimit dhe harmonisë në Shkodër.
           
Përshëndetjet e tij dhe urimet me rastin e Ramazanit dhe kësaj sofre bujare, i ka dhënë edhe At Aleksandër Petani, Famullitar i Kishës Ortodokse në Shkodër.
           
Gjatë këtij iftari është dëshmuar më së miri fryma e mirëkuptimit, vëllazërisë dhe harmonisë në mesin e besimtarëve dhe drejtuesve lokalë e fetarë të Shkodrës.           

Iftari i kësaj nate është mbyllur me duanë e bërë nga H. Fejzi Zaganjori.