Për të dytin vit radhazi, ditën e hënë, më 29 korrik 2013, “Rozafa Sea Food”, ka shtruar iftarin e Muajit Ramazan, në ambientet e saj pranë xhamisë së Parrucës.
           
Të pranishëm në këtë sofër bujare të Ramazanit, kanë qenë antarët e Këshillit të Myftinisë Shkodër, drejtues të lartë të Komunitetit Mysliman të Shqipërisë, Myftiu i Malësisë së Madhe, imamë, teologë, aktivistë të Myftinisë Shkodër etj., që kanë kaluar së bashku një mbrëmje të këndshme, në shoqëri të bisedave të dobishme, lutjeve dhe urimeve për këto ditë të begata të Muajit Ramazan.
           
Në fjalën e tij përshëndetëse, Myftiu i Shkodrës Imam Muhamed Sytari, pasi ka falënderuar pronarët e këtij biznesi në Shkodër, ka vlerësuar iniciativën e shtrimit të iftareve, si një dëshmi besimi dhe vlerësimi ndaj përkushtimit dhe sakrificës së agjëruesve. Ai ka vlerësuar atmosferën e besimit dhe klimën e respektit ndaj agjërimit në Shkodër, si një vlerë që sa vjen e shtohet.
           
Iftari ka dëshmuar modelin e harmonisë dhe vëllazërisë në mesin e besimtarëve, që dëshmojnë përkushtimin e tyre ndaj njërës prej pesë shtyllave kryesore të fesë islame; agjërimit të muajit Ramazan.           

Myftiu ka falënderuar në mënyrë të veçantë edhe drejtuesit e lartë të K.M.Sh, nën/kryetarin z. Gazmend Aga, kancelarin z. Ali Zaimi, drejtorin e kulturës z. Genti Kruja dhe drejtorin e vakëfit z. Uran Kalej, për praninë e tyre dhe pjesëmarrjen në këtë iftar vëllazëror.