Ditën e dielë, më 28 korrik 2013, Myftinia Shkodër ka organizuar një iftar vëllazëror me besimtarë të moshave të ndryshme të xhamisë së lagjes Bahçallëk.
           
Iftari është shtruar në ambientet e xhamisë, në vazhdën e aktiviteteve për gjallërimin e jetës fetare dhe komunitare në xhaminë e kësaj lagjeje, në hyrje të Shkodrës.
           
Myftiu i Shkodrës Imam Muhamed Sytari, e ka vlerësuar këtë iftar si një mundësi për të dëshmuar në komunitet vlerën e madhe që ka feja dhe besimi për t’i bashkuar njerëzit, pa dallime moshash e kulturash, edhe në sofra të përbashkëta e familjare, si ky iftar vëllazëror.
           
Myftiu ka përshëndetur punën e imamit të xhamisë, si dhe angazhimin e brezit të ri për ta frekuentuar xhaminë, për t’u bërë dëshmitar dhe përçues të mësimeve që mësojnë në këtë vend të adhurimit, lutjes dhe edukimit më të mirë.           

Gjatë iftarit janë këmbyer biseda dashamire dhe vëllazërore, ku nuk kanë munguar edhe vlerësimet për këtë organizim sa të thjeshtë, aq edhe të nevojshëm për dëshmimin sa më tërheqës të këtij Muaji të begatë të Ramazanit.