Të mërkurën, më 24 korrik 2013, në ambientet e një prej restoranteve të qytetit të Shkodrës, Shoqata “Ardhmëria”, ka shtruar një iftar me rastin e Muajit të Begatë të Ramazanit.
           
Myftiu i Shkodrës, imamë, teologë, intelektualë, drejtues të medresesë e shoqatave islame në Shkodër, kanë ndarë mesazhe të harmonisë e vëllazërisë islame në sofrën e këtij iftari bujar, në shoqëri të drejtuesve dhe aktivistëve të Shoqatës “Ardhmëria”.
           
Në rolin e përfaqësuesit të shoqatës për Shkodrën, ka përshëndetur teologu Bashkim Bajraktari, që ka uruar agjërim të mbarë dhe të lehtë për të pranishmit.

Iftari është përshëndetur edhe nga Drejtori i Shoqatës “Ardhmëria”, me qendër në Tiranë, teologu Ferid Piku. Në fjalën e tij, ai ka vënë theksin te nevoja e bashkëpunimit në mesin e muslimanëve, të cilët kanë mundësi për të dëshmuar mirësitë e fesë së tyre në marrëdhënie me njëri-tjetrin dhe me shoqërinë. Njëkohësisht ka tërhequr vëmendjen e të pranishëmve drejt përfitimit nga ditët e këtij Muaji për të përfituar nga shpirti i harmonisë dhe vëllazërisë islame.

Edhe Myftiu i Shkodrës Imam Muhamed Sytari, ka vlerësuar se përpjekja për ta rritur cilësinë e perceptimit të agjërimit, në drejtim të rritjes së ndjenjës së vëllazërisë islame dhe bashkëpunimit në mesin e muslimanëve, është një qëllim që nuk duhet lënë pas dore në këto ditë.

Myftiu, ka falënderuar kontributin e Shoqatës “Ardhmëria” në shërbim të projekteve dhe aktiviteteve të dobishme islame, veçanërisht në Shkodër. Ai ka falënderuar drejtorin e kësaj shoqate dhe ka uruar agjërim të lehtë e të mbarë për të pranishmit, në ditët e mbetura të këtij Muaj.