Për të tetin vit me radhë, minibashkia “Bajram Pasha” e Stambollit në bashkëpunim me Bashkinë Shkodër dhe Myftininë Shkodër, kanë shtruar iftarin e madh në pedonalen e Bashkisë Shkodër, ditën e mërkure, më 17 korrik 2013.
           
Me qindra besimtarë kanë mbushur tryezat e shtruara me këtë rast, duke dëshmuar një frymë besimi dhe harmonie islame, për të cilën karakterizohet qyteti i Shkodrës.
           
Pak para fillimit të këtij iftari, Myftiu i Shkodrës Imam Muhamed Sytari ka dhënë një mesazh të vëllazërisë dhe të harmonisë islame, si dhe ka falënderuar drejtuesit e minibashkisë “Bajram Pasha”, në një lidhje të drejtpërdrejtë me televizionin turk “Tek Rumeli”. Myftiu ka vlerësuar shpirtin e historisë që bashkon shqiptarët me turqit, si drejtues dhe bashkësundues të botës për shekuj me radhë, gjatë shekujve të artë të kalifatit osman. Myftiu ka dhënë mesazhe të besimit dhe shfrytëzimit të ditëve të Muajit Ramazan për të ndërtuar në jetë, edhe për Zërin e Amerikës dhe TRT Turke.
           
Aktiviteti ka vijuar me leximin e pjesëve kur’anore dhe ezanit live nga vëllau Ervin Metani. Më pas, Myftiu i Shkodrës dhe Kryetari i Bashkisë Shkodër kanë dhënë mesazhet e tyre për të pranishmit, duke vlerësuar ditët e Ramazanit si mundësi pajtimi, vëllazërimi dhe besimi.
           
Të pranishmit kanë shijuar edhe këndimin e ilahive të shumta të kënduara nga artistët shqiptarë dhe ata të ardhur nga Stambolli.           

“Karvani i bereqetit”, siç është titulluar kjo sofër e begatë, do të vijojë edhe në disa prej qyteteve të Shqipërisë, për të vijuar rrugëtimin e saj drejt vendeve të tjera të Ballkanit.