Ditën e shtunë, më 13 korrik 2013, imamët e Myftinisë Shkodër kanë marrë pjesë në iftarin e shtruar nga Shoqata “Istanbul”, në ambientet e Medresesë së vajzave.
           
Me këtë rast, Myftiu i Shkodrës Imam Muhamed Sytari ka falënderuar drejtuesit e kësaj shoqate për këtë ftesë bujare dhe ka theksuar se Muaji Ramazan shërben për të mbledhur besimtarët në sofrat e besimit dhe të vëllazërisë.

Me këtë rast, Myftiu ka bërë thirrje që imamët dhe drejtuesit e institucioneve islame të kenë parasysh ruajtjen e harmonisë dhe shenjtërimin e vëllazërisë islame në mes vete. Ai ka kërkuar që amaneti i Thirrjes Islame dhe shërbimet ndaj këtij amaneti të jenë mbi çdo prioritet tjetër të krejt imamëve, myftinive dhe shoqatave bamirëse islame.

Myftiu ka falënderuar kontributin e Shoqatës “Istanbul”, që prej vitesh po krijon një traditë të vyer në shtrimin e iftareve, në shenjë të bamirësisë dhe vëllazërisë islame.
           
Pas një iftari vëllazëror, të pranishmit kanë falur së bashku namazin e akshamit.           

Muaji Ramazan është muaj në të cilin shtohen sofrat e iftarit, si shenjë e vëllazërisë, harmonisë dhe bashkëpunimit në mesin e muslimanëve dhe pjestarëve të shoqërisë ku ata jetojnë.