Për të tretin vit radhazi, ditën e xhuma, më 5 korrik 2013, Myftinia Shkodër ka organizuar aktivitetin ndërkombëtar “Sofra e Kur’anit”, në xhaminë e Parrucës.
           
Fillimisht, nga minberi i xhumasë, Myftiu i Shkodrës Imam Muhamed Sytari ka lajmëruar të pranishmit se të ftuar specialë të kësaj xhumaje, janë edhe: Hafiz Abdylgafarr Levent, (vaiz i xhamisë Fatih), Stamboll, Hafiz Mehmet Duma, (muezin i xhamisë Sulejmanije), Stamboll, Hafiz Hasan Kara, (imam i xhamisë “Sulltan Ahmet”), Stamboll dhe Hafiz Elsaid Fatih Alsaid, nga Danimarka. Myftiu ka vlerësuar se ky aktivitet është një sihariq hyjnor për një muaj të begatë të mbushur me besim, aktivitete dhe bamirësi.

Menjëherë pas namazit të xhumasë, teologu Arben Halluni ka bërë prezantimin e aktivitetit, ku ka vlerësuar pjesëmarrjen e hafizëve të nderuar nga Stambolli, në mesin e besimtarëve shkodranë. Ai ka theksuar se ky aktivitet është pjesë e një mori tubimesh, tribunash dhe aktivitetesh fetare që ka planifikuar Myftinia Shkodër për Muajin e Begatë të Ramazanit të sivjetshëm.

Më pas, hafizët e nderuar kanë kënduar pjesë të ndryshme nga Kur’ani, duke e gjallëruar xhaminë dhe duke krijuar emocione të veçanta, nëpërmjet zërit kumbues dhe melodioz.

Aktiviteti është mbyllur me një duá nga Hafiz Elsaid Fatih Alsaid, që ka emocionuar të pranishmit dhe ka përcjellë një përshpirtësi të munguar.