Pasditën e së xhumasë, më 28 qershor 2013, Myftinia Shkodër ka organizuar promovimin e dy botimeve të saj më të reja, “Toleranca në Islam” dhe “Grupi i shpëtuar është i gjithë ummeti islam” të përkthyera nga thirrësi islam Lavdrim Hamja.
           
Aktiviteti është përshëndetur nga Myftiu i Shkodrës Imam Muhamed Sytari, i cili pasi ka falënderuar përkthyesin për punën plot zell dhe prodhimtari, ka vlerësuar dy librat e rinj si të vlefshëm dhe të nevojshëm për bibliotekën islame në gjuhën shqipe.  

Myftiu ka përmendur se libri “Toleranca në Islam”, shkruar nga Dr. Sheuki Ebu Khalil, një ndër personalitetet më të famshëm të historisë islame të shekullit, është padyshim një botim me vlerë, për të lexuar dhe kuptuar nëpërmjet argumenteve të bollshme, realitetin e marrëdhënies së muslimanëve me jomuslimanët, gjatë shekujve.
           
Ka vlerësuar gjithashtu librin “Grupi i shpëtuar është i gjithë ummeti islam”, si një përpjekje të lavdëruar për të shëruar injorancën dhe keqpërdorimin e teksteve fetare nga individë dhe grupe të caktuara, brenda familjes islame.
           
Mbi librin e parë ka folur teologu Arben Halluni, që ka referuar rreth temës: “Mbi tolerancën ndërfetare në Islam”. Ndërkohë, teologu Idmir Plaku ka zhvilluar një recensë të librit të dytë, ku ka diskutuar rreth temës: “Ymeti islam dhe sprova e përçarjes”.
           
Aktiviteti është përshëndetur edhe nga H. Fejzi Zaganjori, imam i xhamisë Rus, i cili ka vlerësuar punën dhe angazhimet e thirrësit islam Lavdrim Hamja, si dhe i ka uruar suksese të mëtejshme në punën e tij.
           
Në fjalën e tij përshëndetëse para të pranishëmve, përkthyesi Lavdrim Hamja, ka falënderuar bashkëpunëtorët, Myftininë Shkodër, familjen dhe miqtë e tij për mbështetjen dhe mendimet e vyera, gjatë punës për nxjerrjen në dritë të këtyre dy libra të rinj.
           
Ai ka theksuar se është detyrë e teologëve dhe thirrësve të rinj, të mos lënë pas dore botën e librit, të përkthejnë e të shkruajnë, për të mirën e vetë librit dhe Thirrjes Islame.