Pasditën e së mërkurës, më 26 qershor 2013, Myftiu i Shkodrës Imam Muhamed Sytari ka pritur në një takim të përzemërt Konsullin e Shtetit të Kuvajtit në Tiranë, z. Fajsal Al-Bakr.
           
Fillimisht, Myftiu i ka uruar mirëseardhjen në Shkodër z. Al-Bakr, duke e konsideruar këtë vizitë si një ogur i mirë, në prag të fillimit të Muajit Ramazan. Kjo, edhe për faktin se Ambasada e Kuvajtit në Tiranë, ka dërguar një sasi ndihmash ushqimore për Myftininë Shkodër, si pjesë e projektit bamirës në vigjilje të Muajit Ramazan.
           
Gjatë takimit, Myftiu i Shkodrës dhe Konsulli i Kuvajtit, kanë diskutuar edhe mbi realizimin e projekteve të ndryshme, në kuadër të bashkëpunimit dypalësh. Myftiu ka falënderuar Shtetin e Kuvajtit dhe shoqatat e ndryshme bamirëse të këtij vendi mik e vëlla, për angazhimin e madh në shërbim të Thirrjes Islame në çdo cep të botës, si dhe në Shqipëri.
           
Me rastin e kësaj vizite, Myftiu i ka dorëzuar konsullit Al-Bakr, një falënderim dhe mirënjohje, drejtuar ambasadorit të Kuvajtit në Shqipëri, z. Najjeb Al-Bader, si dhe Qeverisë së Kuvajtit, për kontributin dhe praninë e tyre në Shqipëri, si një mbështetje e rëndësishme për zhvillimin e mëtejshëm të lidhjes në mes dy popujve dhe kontributin në rrugën e gjallërimit të vlerave islame.           

Me rastin e kësaj vizite të Konsullit të Kuvajtit, Myftinia Shkodër ka bërë shpërndarjen e 30 pakove me ushqime për Shtëpinë e Fëmijës në Shkodër, në prani edhe të drejtorit të këtij institucioni, z. Arjan Dushaj.