Pasditën e së xhumasë, më 21 qershor 2013, Shoqata Kulturore Humanitare “Burimi” dhe Myftinia Shkodër kanë organizuar promovimin e dy botimeve të reja me titull: “Mbi Traditën profetike” dhe “Për Fjalën më të bukur”, të teologut Gilman Kazazi, imam i xhamisë “Ebu Bekër” dhe mësues në Medresenë “Haxhi Sheh Shamia”.

Aktiviteti është hapur me leximin e një pjese kur’anore. Më pas, teologu Arben Halluni ka bërë prezantimin e qëllimit të këtij aktiviteti, në qendër të cilit ishte promovimi i këtyre dy botimeve të reja, mbështetur nga Shoqata “Burimi”.

Në përshëndetjen e tij, z. Sokol Mandi, Drejtor i Shoqatës “Burimi”, ka vënë theksin te nevoja e botimeve të reja, aq më shumë të atyre që nxisin vlerësimin e Kur’anit dhe Traditave profetike të Hz. Muhammedit (a.s).

Imam Muhamed Sytari, Myfti i Zonës Shkodër, ka falënderuar bashkëpunimin me Shoqatën “Burimi” dhe ka vlerësuar dy botimet e reja, si një vazhdimësi e frymës së qytetëruar të hoxhallarëve të shkuar të Shkodrës.
           
Më pas kanë referuar regjisori Armand Bora dhe teologu Durim Kasemi rreth temave: “Në rrugën e devotshmërisë - dy libra që shpjegojnë dhe përkujtojnë” dhe: “Kur’ani dhe Syneti - binomi i përhershëm i Islamit”.
           
Në referatet e mbajtura, janë analizuar dy botimet dhe është vlerësuar fryma e botimeve të reja nga teologët e rinj shqipfolës.
           
Në fund, teologu Gilman Kazazi, autor i dy botimeve në fjalë, ka falënderuar të gjithë kontribuuesit për realizimin e punës së tij, si dhe ka shprehur kënaqësinë e këtij aktiviteti me vlerë.Për të ftuarit, është bërë shpërndarja e dy librave të rinj dhe është organizuar një ftesë për kafe dhe çaj.