Paraditën e së martës, më 18 qershor 2013, Myftiu i Shkodrës Imam Muhamed Sytari, ka pritur në një takim të përzemërt e vëllazëror, Myftiun e Elbasanit H. Agim Duka, në shoqëri të studiuesit ing. Mukhtar El-Mesalati (Universiteti i Mbretit Abdulaziz, Xheddah - Arabia Saudite), si dhe të një grupi imamësh dhe antarë të xhemateve të Elbasanit.
           
Fillimisht, Myftiu i ka uruar mirëseardhjen në Shkodër homologut të tij dhe ka shprehur kënaqësinë e tij për këtë vizitë vëllazërore në Shkodër, që vjen në atmosferën e prag-Ramazanit.
           
Të dy myftilerët kanë bashkëbiseduar për gjendjen e dy myftinive, aktualitetin e Thirrjes Islame në vend, çështjen e pronave vakëf, atë të botimeve dhe aktivitetit fetar në xhami dhe jashtë tyre.
           
Nga ana e tij Myftiu i Elbasanit H. Agim Duka, ka theksuar se këto vizita e rrisin frymën e bashkëpunimit dhe të harmonisë në mes të myftinive, imamëve dhe xhemateve përkatëse. Njëkohësisht, ka theksuar se kjo vizitë vjen në kuadër të aktiviteteve të larmishme që organizon Myftinia Elbasan me imamët dhe xhematet e saj.
           
Një bashkëbisedim të ngrohtë, Myftiu i Shkodrës ka zhvilluar edhe me studiuesin ing. Mukhtar El-Mesalati, autor i një libri me vlera mbi Kur’anin Famëlartë, në gjuhën angleze, të cilin e ka falënderuar për vizitën dhe praninë e tij në Shkodër.           

Me rastin e kësaj vizite, janë këmbyer dhuratat simbolike dhe më pas është vizituar edhe xhamia e Parrucës, ku është kryer edhe falja e namazit të mesditës me xhemat. Pas namazit të mesditës, Myftiu i Shkodrës dhe ai i Elbasanit, i janë drejtuar besimtarëve të pranishëm me një përshëndetje vëllazërore.