Pasditën e së hënës, më 10 qershor 2013, ka nisur edicioni i parë i Kupës “Vllaznimi”, në mesin e xhamive të Myftinisë Shkodër.
           
Aktiviteti sportiv, më i madh i vitit, ka mbledhur përfaqësues të 16 ekipeve, ku janë përfshirë përfaqësues të xhamive të qytetit dhe të xhamive të zonave të Myftinisë Shkodër.
           
Në fjalën e hapjes, para të pranishëmve, përgjegjësi i sektorit të arsimit, teologu Arben Halluni, ka shpjeguar rëndësinë e këtij aktiviteti dhe nevojën për të afruar sa më shumë aktivitete dhe risi për të rinjtë e xhamive të Shkodrës.
           
Imam Muhamed Sytari, në fjalën e tij, ka vënë theksin te nevoja e organizimit të muslimanëve në Shkodër. Ai ka theksuar se ky aktivitet nuk duhet të forcojë idenë e ndarjes në parti e grupe, por të nxisë më shumë frymën e vëllazërisë dhe harmonisë në mesin e muslimanëve. Myftiu ka kërkuar nga të rinjtë që të kuptojnë drejtë rëndësinë e të qenurit musliman dhe domosdoshmërinë e mos shitjes së identitetit dhe fytyrës, për asnjeri në botë.
           
Aktiviteti është përshëndetur edhe nga përgjegjësi i sektorit të rinisë, teologu Ervil Kuçi.
           
Pas hedhjes së shortit, kanë nisur ndeshjet e para dhe pritet që në harkun e tetë ditëve, të zhvillohen ndeshjet në mesin e xhamive të Myftinisë Shkodër.
           
Sipas shortit të hedhur, do të jenë këto përballje:

Ana e Malit – Vau i Dejës
Dajç – Bërdicë
Rrethina – “Ebu Bekër”
Perash – Guri i Zi
Bahçallek – Bushat
Ajasëm – Kiras
Rus – Parrucë
Postribë – Tophanë

Në përfundim të këtyre ndeshjeve, do të zhvillohen edhe fazat e mëtejshme, deri në finalen e Kupës “Vllaznimi”.