Pasdrekën e së mërkurës, më 5 qershor 2013, Myftiu i Shkodrës Imam Muhamed Sytari ka pritur në zyrën e tij delegacionin e “Bejtuz-Zekat”, nga Kuvajti, në shoqëri të Drejtorit të Shoqatës “Mirësia”, z. Korab Kaja.
           
Fillimisht, Myftiu ka uruar mirëseardhjen e delegacionit kuvajtian në Shkodër, duke theksuar se Shkodra është qyteti i dijes dhe dijetarëve islam, duke përmendur një pjesë të dijetarëve islamë shkodranë, që bëjnë pjesë në elitën e dijetarëve të botës islame, prej të cilëve ka përfituar dhe përfiton mbarë ymeti islam.
           
Myfti ka bërë një prezantim të gjendjes së Thirrjes Islame në Shkodër dhe ka përmendur sfidat e shumta, me të cilat përballet Myftinia Shkodër, sidomos në 23 vitet e fundit të ringjalljes së lirive të besimit në Shqipëri. Myftiu ka theksuar se Myftinia Shkodër po lobon ditë pas dite për të afruar donatorë të ndryshëm për të rehabilituar infrastrukturën islame në Shkodrën, qytetin e minareve dhe xhamive të shumta, që u shkatërruan gjatë periudhës së errët komuniste.
           
Nga ana e tyre, miqtë, kanë falënderuar Myftiun për mikpritjen dhe kanë theksuar se janë krijuar kushtet për ta thelluar bashkëpunimin për vepra të mira, aq më shumë që institucioni i “Shtëpisë së Zekatit”, në Kuvajt është i interesuar për të mbështetur projekte të ndryshme edhe në Shqipëri.           

Më pas, Myftiu dhe delegacioni kuvajtian, kanë inspektuar një prej pronave vakëf të Myftinisë Shkodër, ku planifikohet të ngrihet një qendër e re islame në qytetin e Shkodrës.