Pasditen e së enjtes, më 16 maj 2013, në sallën e konferencave të medresesë së djemve, Myftinia Shkodër ka organizuar një aktivitet fetar me rastin e hyrjes së Tre Muajve të Mirë; Rexheb, Shaban dhe Ramazan.
           
Aktiviteti ka nisur me leximin e një pjese kur’anore nga Hafiz Shukri Kapllan. Më pas ka përshëndetur Myftiu i Shkodrës Imam Muhamed Sytari, që ka sinjalizuar mirësinë e madhe me të cilën Zoti i gjithësisë e ka begatuar ymetin islam, duke i dhuruar herë pas here mundësi të ndryshme afrimi me dashurinë, mëshirën dhe bujarinë e Tij të pakufijshme.
           
Myftiu ka thënë se këta tre muaj janë një mundësi reflektimi dhe kthimi nga Zoti, për t’u larguar nga rutina e përditshme, pa dritë besimi, udhëzimi e mëshire.
           
Myftiu ka kërkuar nga të pranishmit, që gjatë këtyre ditëve dhe netëve të begata, të bëhen lutje edhe për muslimanët në Siri, në Palestinën e pushtuar, në Irak, në Burma e në çdo cep të botës islame, ku “tentakulat e së keqes kanë vërshuar mbi çdo shtëpi dhe cep të zonave islame”.
           
Më pas, programi ka vijuar me referatet e mbajtura nga teologët Idmir Plaku (imam i xhamisë “Ebu Bekër”), Durim Kasemi (imam i xhamisë Parrucë) dhe Bashkim Bajraktari (imam i xhamisë Tepe).
           
Në referatet e mbajtura prej imamëve të nderuara është folur për këto tema: “Tre Muajt e Mirë në Kur’an dhe Hadith”, “Vlera e dhikrit dhe e adhurimeve në Tre Muajt e Mirë” dhe “Tre Muajt e Mirë dhe vlerat sociale”.           

Me shumë emocion është ndjekur recitimi i medresistit Erisad Lugjaj, që ka interpretuar me shumë patos një poezi të shkruar nga vetë ai.