Paraditën e së enjtes, më 2 maj 2013, Myftinia Shkodër ka organizuar një aktivitet fetar masiv në fshatin Kosmaç, Komuna Bushat.
           
Aktiviteti, që zhvillohej në oborrin e xhamisë, nisi me leximin e disa ajeteve kur’anore, pas të cilave teologu Arben Halluni foli mbi rëndësinë e tubimeve në të cilat përmendet All-llahu dhe udhëzimi i Tij, në Kur’an dhe në jetën e Profetit Muhammed (a.s).
           
Imam Muhamed Sytari, Myfti i Zonës Shkodër, në fjalën e tij ka folur mbi dashurinë e Hz. Muhammedit (a.s) për ymetin e tij, para se ata të ishin në këtë jetë. Ka përmendur dashurin�� e sahabëve për të dërguarin e All-llahut dhe ka sjellë shembuj mbi këtë dashuri.
           
Myftiu ka kërkuar që përherë në jetën e besimtarit, të ketë një moment reflektimi, në të cilin të pyesë veten: Sa e dua unë All-llahun? Sa e dua Resulull-llahin? Sa jam i gatshëm unë sot, për ta shtrirë dorën e besës dhe të përuljes para mësimeve dhe udhëzimeve të fesë sime? Etj.
           
Në fjalën e tij, ka kërkuar që familja shqiptare të mbrohet me anë të besimit dhe fesë, të mos ketë ndrojtje për të dëshmuar identitetin islam, të mos ndikohet nga thirrjet shterpë të atyre që thërrasin për zhveshje nga Islami, në një mënyrë a një tjetër.
           
Më pas, janë kënduar ilahi, pjesë nga “Mevludi ” i Hafiz Ali Ulqinakut dhe salavate, nga: z. Bujar Hoxhani (imami i xhamisë Kosmaç), H. Shukri Kapllan (imam i xhamisë Bushat), z. Nadi Braqi etj.           

Në përfundim të këtij aktiviteti, H. Fejzi Zaganjori ka bërë duanë e tubimit dhe më pas besimtarët janë përshëndetur dhe me njëri-tjetrin dhe kanë falur namazin e mesditës në ambientet e xhamisë.