Ditën e xhuma, më 19 prill 2013, Myftiu i Shkodrës Imam Muhamed Sytari ka mbajtur hytben e parë të xhumasë në xhaminë e re të fshatit Kuç, ceremonia e inaugurimit të së cilës u zhvillua një ditë më parë.
           
Fillimisht, në hytben e tij, Myftiu ka shprehur emocionin dhe kënaqësinë për mbajtjen e kësaj hytbeje të parë në një xhami, ku dominojnë të rinjtë dhe mosha e parë, të cilët janë një dritë shprese dhe optimizmi për gjallërimin e kësaj xhamie të bukur.
           
Më pas, Myftiu ka folur mbi vlerën dhe rëndësinë që kanë xhamitë në Islam, për edukimin e individit dhe shoqërisë me vlerat e besimit dhe përuljes ndaj Zotit në jetë. Ndër të tjera ka përmendur se: “Shoqëria shqiptare, më mirë se kushdo e di se çfarë do të thotë të jetosh në luftë me Zotin! Ky vend është damkosur me çnderimin që i bënë komunistët duke e shpallur si vendin e vetëm ateist në botë! Të jeni të bindur se bijtë e tyre, akoma vazhdojnë të luftojnë kundër fesë dhe besimit, tashmë në emër të integrimit evropian, për mbrojtjen e të drejtave të gruas, për lirinë e individit e të tjera thirrje, që në pamje të parë i duam të gjithë, por që në të vërtetë fshehin frymën e tyre afetare!”           

Myftiu ka kërkuar nga të pranishmit që ta ruajnë xhaminë, ta kthejnë në një vend të shenjtë, siç ai është dhe të bëhen frekuentues të rregullt të saj, duke e dëshmuar pa ndrojtje besimin dhe Islamin e tyre. “Të jesh musliman sot, do të thotë të jetosh sipas porosive dhe urdhëresave të fesë tënde dhe të mos ndikohesh nga thirrjet shterpë të klasës politike dhe të disa shpirt-shiturve, që bërtasin poshtë e përpjetë për kthim në “fenë e të parëve”! Feja e të parëve tanë është Islami! Feja e jonë është Islami!”- ka përfunduar Myftiu.