Ditën e xhuma, më 29 mars 2013, Myftiu i Shkodrës Imam Muhamed Sytari, ka mbajtur hytben e xhumasë në xhaminë e fshatit Drisht në Komunën Postribë.
           
Në fjalën e tij para besimtarëve të pranishëm, Myftiu ka shprehur fillimisht dhembjen e tij të madhe për realitetin e mjerë të rrugës që shpie nga Ura e Mesit deri në fshatin Drisht. Myftiu ka shprehur habinë sesi, për 23 vite, nga periudha e postkomunizmit e deri më sot, askush nuk është interesuar për realitetet e këtij fshati, banorët e të cilit jetojnë në varfëri e skamje dhe udhëtojnë çdo ditë në një rrugë jashtë çdo standarti njerëzor.
           
Më pas, Myftiu ka shprehur zhgënjimin e tij nga drejtuesit e Komunës Postribë dhe ata të Qarkut Shkodër, që nuk dhanë asnjë ndihmë për të pastruar territorin vakëf të xhamisë Drisht nga zaptimi Ilegjitim i tij, fakt që ndaloi ndërtimin e xhamisë së re në këtë fshat. “Megjithë këto fakte, asgjë nuk do të na ndalë për të realizuar qëllimin tonë për ndërtimin e xhamisë së re në tokën e shenjtë të muslimanëve të Drishtit!”- ka thënë Myftiu, që ka nxitur nisjen e punës për organizimin e fushatës për mbledhjen e fondeve, si dhe dhënien e një rrugëzgjidhje për ndërtimin e një xhamie të re dinjitoze për besimtarët e këtij fshati.
           
Gjatë hytbes së xhumasë, Myftiu ka folur edhe për vlerat e dhikrit, përmendjes së vazhdueshme të All-llahut dhe nevojën e mospajtimit me realitete, që vazhdojnë të na mbajnë peng, larg qëllimeve dhe orientimeve të fesë dhe besimit.           

Pas përfundimit të namazit të xhumasë, Myftiu ka zhvilluar edhe një bashkëbisedim me besimtarët e kësaj xhamie, ku është diskutuar edhe për realitetin e vakëfit të zaptuar, domosdoshmërinë e ndërtimit të një xhamie të re, pasi xhamia aktuale, përveçse monument kulture, është në një gjendje shumë të amortizuar dhe rrezikon ditë pas dite besimtarët e saj frekuentues.