Paraditën e së martës, më 19 mars 2013, Myftiu i Shkodrës Imam Muhamed Sytari, ka zhvilluar një inspektim në terren për të parë nga afër gjendjen e deritanishme të dy xhamive të reja në ndërtim, asaj në fshatin Barbullush dhe tjetrës, te Ura e vjetër e Bunës.
           
Fillimisht në Barbullush, ku ndërtimi vazhdon me rregullsi, Myftiu ka ndjekur nga afër punimet dhe ka shfaqur mendimet e tij edhe në lidhje me shfrytëzimin e mëtejshëm të vakëfit të kësaj xhamie. Është vlerësuar mundësia e shfrytëzimit të terrenit, jashtë projektit të xhamisë që do të financohet nga Myftinia e Iskenderunit në Turqi, në shërbim të komunitetit. Në këtë drejtim, Myftinia Shkodër po shqyrton dy kërkesa që kanë mbërritur ditët e fundit për shfrytëzimin e këtij terreni.
           
Myftiu ka parë nga afër edhe gjendjen e xhamisë te Ura e Bunës, ku për arsye të kushteve të vështira atmosferike të ditëve të fundit, punimet janë pezulluar. Përtej kësaj, minareja e kësaj xhamie ka mbërritur drejt fundit, duke u bërë shenjë dalluese edhe nga larg.           

Myftiu është lutur që këto punime të vazhdojnë me rregullsi dhe dy xhamitë e reja të përfundojnë sa më parë, brenda afateve të përcaktuara, në mënyrë që besimtarët të kenë mundësi të frekuentojnë me rregullsi namazet dhe rite të tjera fetare në to.