Mbrëmjen e së enjtes, më 28 shkurt 2013, nëpërmjet ekranit të Tv1 Channel, teleshikuesit do të kenë mundësinë të ndjekin bashkëbisedimin që gazetari Simon Shkreli, në emisionin e tij “Hapur” ka zhvilluar me Myftiun e Shkodrës Imam Muhamed Sytari, rreth personalitetit të dijetarit të shquar islam H. Vehbi S. Gavoçi.
           
Gjatë bashkëbisedimit, Myftiu i është përgjigjur pyetjeve të ndryshme të gazetarit, ku ka hedhur dritë mbi jetën dhe veprën e Hoxhës së nderuar shkodran H. Vehbi S. Gavoçi, i cili u nda nga kjo botë, ditën e martë, më 19 shkurt 2013, në qytetin Sharika të Emirateve të Bashkuara Arabe, në moshën 90 vjeçare.
           
Myftiu ka theksuar se personaliteti i H. Vehbi S. Gavoçit, është një argument më shumë i lidhjes së shqiptarëve me Islamin dhe kulturën e tij. Kjo edhe për faktin se ky dijetar i madh, la gjurmë të shquara në dije dhe urtësi në mbarë botën islame, ku u shqua për korrektësinë e tij, seriozitetin dhe thellësinë në dije.
           
Janë përmendur edhe vlerësimet e shumta që personalitete islame të botës kanë dhënë rreth kontributit dhe moralit të këtij njeriu të madh, që foli me sjelljen e tij dhe u dëshmua nëpërmjet moralit dhe dijes.
           
Gjatë emisionit del në pah personaliteti i këtij shqiptari të madh, që ndonëse në mërgatë, asnjëherë nuk e harroi gjuhën e tij, mallin për vendlindjen dhe dashurinë e sinqertë për vëllezërit dhe motrat e tij në Shkodër e Shqipëri.           

Për rreth një orë, teleshikuesi do të ketë mundësi të kuptojë vlerat dhe madhështinë e këtij dijetari të shquar në mbarë botën islame.