Mbrëmjen e së dielës, më 24 shkurt 2013, Myftiu i Shkodrës Imam Muhamed Sytari ka ftuar një grup të rinjsh, në një bashkëbisedim vëllazëror të hapur me drejtuesin e Qendrës Islame Shqiptare-Amerikane të Arizonës, Imam Didmar Faja.
           
Në fjalën e tij të hapjes, Myftiu ka theksuar se ky takim është një ftesë vëllazërore për të zhvilluar një bashkëbisedim të hapur me Imam Didmar Fajën, që bart në vetvete eksperienca të shumta pozitive në shërbim të Thirrjes Islame, në ShBA.
           
Myftiu ka sjellur në vëmendjen e të pranishëmve se gjatë dekadave dhe viteve të fundit, Thirrja Islame ka njohur një zhvillim të madh kudo në botë, fakt që na bën të mendojmë dhe të bindemi se ky është shekulli i Islamit. Dhe ky fakt, - ka thënë Myftiu, - është një lajm i mirë për ne dhe mbarë botën.
           
Më pas, Imam Didmar Faja ka folur për disa nga realitetet e Islamit dhe vlerës së lirisë dhe praktikimit të fesë islame në Amerikë. Ai ka vënë në vëmendjen e të ftuarve, se praktikimi i fesë në Amerikë mbrohet me ligj dhe se askush nuk ka të drejtë të ndalojë dikë për të praktikuar fenë e tij, sado që kjo nuk bie ndesh me rregullat dhe liritë e të tjerëve atje.
           
Me shumë kureshtje, të pranishmit kanë dëgjuar rreth historikut të themelimit të xhamisë së shqiptarëve në Phoenix, “Greenway Masjid”, si dhe aktivitetin në rritje të kësaj qendre të rëndësishme islame, që ka afruar rreth vetes edhe besimtarë të shumtë të kombësive të ndryshme, që bashkëjetojnë në harmoni me vëllezërit e tyre muslimanë shqiptarë atje.
           
Më pas, bashkëbisedimi është hapur edhe me ndërhyrjet e teologut Ervil Kuçi, që ka sjellë eksperiencën e tij me organizimet e muslimanëve shqiptarë në Firence të Italisë dhe rëndësinë që ka prezantimi i jomuslimanëve me Islamin nëpërmjet sjelljes dhe moralit të muslimanëve në jetën e përditshme.

Po ashtu teologu Lavdrim Hamja ka folur rreth eksperiencës së tij, si imam në Wisconsin të ShBA dhe lirinë e organizimeve islame atje. Në këtë linjë, Imam Muhamed Sytari ka rrëfyer rreth lirisë dhe natyrshmërisë së kryerjes së riteve fetare, si namazi në ambiente të hapura, të dëshmuara prej tij gjatë udhëtimit në Arizona, Grand Canion etj., duke bërë krahasime me realitete të ngjashme në Shqipëri.
           
Të rinjtë e pranishëm kanë bërë pyetje të ndryshme, rreth së cilave është zhvilluar një bashkëbisedim shumë me vlerë dhe me dobi.           

Në fund, Imam Didmar Faja ka folur edhe për bashkëpunimin e xhamisë me kishën në Amerikë, në shërbim të njohjes reciproke dhe informimin e besimtarëve të krishterë me vërtetësitë e Islamit.