Sipas porosisë së Myftiut të Shkodrës, ditën e xhuma, më 22 shkurt 2013, në të gjitha xhamitë e Shkodrës është mbajtur një hytbe e posaçme në nder të personalitetit dhe kontributit të madh të dijetarit të shquar islam shkodran, H. Vehbi S. Gavoçi, i cili u nda nga kjo jetë, ditën e martë, më 19 shkurt 2013. 

Nga minberi i xhamisë së Parrucës, Myftiu i Shkodrës Imam Muhamed Sytari ka folur mbi lajmin e ndarjes nga jeta të dijetarit të shquar islam H. Vehbi S. Gavoçi. Ai ka vlerësuar kontributin e Hoxhës së nderuar, duke theksuar se është një ndër personalitetet më të shquara islame botërore të shekullit.

Myftiu ka përmendur gjithashtu se në kushte të tjera politike dhe historike për Shkodrën dhe Shqipërinë, larg servilizmit dhe hipokrizisë, ndarja nga jeta e H. Vehbi Gavoçit nuk do të ishte kaluar në heshtje.

Gjatë hytbes së kësaj xhumaje, është folur edhe për kontributin e madh e unik që ka dhënë H. Vehbi Gavoçi për ringjalljen e fesë islame në Shqipëri, sidomos pas viteve ’90, me botimin e dhjetra librave, që janë shtypur në mijëra kopje dhe janë shpërndarë falas, vetëm me qëllim që muslimanët e Shkodrës dhe Shqipërisë të riktheheshin në identitetin e tyre shekullor, pas mortajës komuniste.

Pas namazit të xhumasë, është falur namazi i xhenazes në mungesë për shpirt të H. Vehbi Gavoçit dhe është bërë duaja për shpirtin e Hirësisë së Tij, pas leximit të plotë të 30 xhyzeve të Kur'anit, realizuar nga teologët dhe teologet e Shkodrës, nxënës të Hoxhës së nderuar.