Paraditën e së mërkures, më 20 shkurt 2013, Myftiu I Shkodrës Imam Muhamed Sytari ka thirrur në një mbledhje të jashtëzakonshme imamët e qytetit Shkodër.
           
Ai ka bërë lajmërimin e ndarjes nga jeta të Hoxhës dhe dijetarit të madh islam shqiptar, H. Vehbi S. Gavoçi, pasditën e djeshme në një nga spitalet e Sharikas, në Emiratet e Bashkuara Arabe, në moshën 90 vjeçare.
           
Më pas, Myftiu ka diskutuar me imamët rreth nderimeve të duhura që duhen bërë për personalitetin e këtij dijetari të shquar, për të cilin ka thënë se është: “Ndër personalitetet më të shquara islame shqiptare të shekullit”.
           
Në përfundim të këtij takimi është vendosur si më poshtë:

1. Ditën e xhuma, më 22 shkurt 2013, në të gjitha xhamitë e Shkodrës, pas namazit të xhumasë do të falet NAMAZI I XHENAZES NË MUNGESË, për shpirtin e Hoxhës tonë H. Vehbi S. Gavoçi.

2. Ditën e xhuma, më 22 shkurt 2013, pas namazit të xhenazes në mungesë, në xhaminë e Parrucës do të bëhet duaja e Hatmes së Kur'anit, për shpirt të H. Vehbi Gavoçit. (Myftiu dhe imamët ndanë 30 xhyzet e Kur’anit, leximi i plotë i të cilëve do të bëhet deri të xhumanë).

3. Gjatë ditës së sotme, më 20 shkurt 2013, në të gjitha xhamitë e Shkodrës, pas namazeve ditore, të behën lutje nga besimtarët për shpirtin e Hoxhës së dashur Vehbi Gavoçi.

4. Lajmi i ndërrimit jetë të H. Vehbi Gavoçit, do të transmetohet sot në të gjitha mediat vizive të Zonës Shkodër.

5. Myftinia Shkodër do t'i drejtohet Këshillit të Bashkisë Shkodër që rruga e lagjes ku ka lindur H. Vehbi S. Gavoçi, të marrë emrin e tij.