Me ftesë të Myftiut të Shkodrës Imam Muhamed Sytari, ditën e xhuma, më 15 shkurt 2012, Drejtuesi i Qendrës Islame Shqiptare-Amerikane të Phoenix, në Arizona të ShBA, Imam Didmar Faja, ka mbajtur hytben e xhumasë në xhaminë e Parrucës.
           
Në prag të namazit të xhumasë, Imam Muhamed Sytari ka mbajtur një fjalë para besimtarëve, në të cilën ka bërë një prezantim të aktivitetit të frytshëm të drejtuesit të AAIC të Phoenix, Imam Didmar, gjatë viteve të fundit në Shtetet e Bashkuara të Amerikës.
           
Myftiu ka përmendur numrin e madh të amerikanëve të konvertuar në Islam gjatë viteve të fundit në Qendrën Islame Shqiptare-Amerikane në Phoenix. Duke i uruar mirëseardhjen në Shkodër, ka lajmëruar se hytbeja e xhumasë së sotme do të mbahet nga imami i nderuar.
           
Ndërkohë, në hytben e tij të xhumasë, Imam Didmar Faja, ka folur mbi rëndësinë dhe vlerën e studimit të jetës dhe virtyteve të Hz. Muhammedit (a.s), si I dërguari i fundit dhe “mëshirë për mbarë botrat”.
           
Gjatë hytbes së xhumasë, është cekur edhe realiteti i sotëm në vendin tonë dhe tendenca e verbër për të imituar perëndimin. Imam Didmar Faja, ka theksuar se imitimi i verbër është një humbje dhe devijim nga rruga e traditave dhe virtyteve tona si shqiptarë dhe si muslimanë.
           
Në hytben e xhumasë së sotme, është folur edhe për turpin e madh të përjashtimit të vajzave me shami nga shkollat, paragjykimin dhe persekutimin e tyre në Shqipërinë e sotme. “Ndërkohë në Amerikë, edhe në Shtëpinë e Bardhë ka punonjëse me hixhab”- ka thënë Imam Didmar Faja.
           
Pas përfundimit të namazit dhe riteve të xhumasë, ai është takuar me besimtarë të shumtë, që i kanë uruar mirëseardhjen në vendlindje dhe e kanë falënderuar për hytben e mbajtur.